Теннис бўйича Ўзбекистон эркаклар терма жамоаси сентябрь ойида “Дэвис кубоги“нинг II Жаҳон гуруҳи доирасида Эстония термасини 3:1 ҳисобида мағлуб этган ҳолда навбатдаги босқичга чиққан эди.
Шу тариқа, I Жаҳон гуруҳи учун плей-офф босқичида теннисчиларимиз Босния ва Герцеговина терма жамоаси билан рақобатлашади. Ушбу баҳс 2025 йилнинг 31 январь-1 февраль кунлари Ўзбекистонда ўтказилади. Шу кунларда мазкур мусобақани мамлакатимизнинг қайси ҳудудида ва мажмуасида ўтказилиши муҳокама қилинмоқда.
Маълумот ўрнида: Ўзбекистон терма жамоасининг I Жаҳон гуруҳига чиқиш остонасидаги рақиби билан бугунга қадар бирор маротаба ҳам ўйин ўтказмаган. Ҳозирда термамиз “Дэвис кубоги“ рейтингида 287,5 очко билан 42-ўринда қайд этилган бўлса, Босния ва Герцеговина мазкур рейтингда 30-ўринда бормоқда.
Жавоҳир Тошхўжаев, ЎзА