Сеул шаҳрида Ўзбекистондаги IT ва BPO соҳалари салоҳиятини ёритиб берган “Uzbekistan Outsourcing Conference” тадбири бўлиб ўтди.

Конференцияда бизнесни рўйхатдан ўтказиш жараёни, IT-Парк резидентлари учун солиқ имтиёзлари ҳамда корейс тилини биладиган ўзбекистонлик IT-мутахассисларнинг салоҳиятидан Корея бозорида фойдаланиш стратегиялари каби муҳим мавзуларда бир қатор тақдимотлар ўтказилди.

Инсон капитали, хусусан, тажрибали мутахассислар сони ҳамда ёш иқтидор эгаларининг малакасини ошириш ва келгусида иш билан таъминлашга алоҳида эътибор қаратилди. Иштирокчилар стартап лойиҳалари доирасида йирик компаниялар билан ҳамкорлик қилиш имкониятлари ва келгусида ишга жойлаштириш учун кадрлар захираси мавжудлигига қизиқиш билдирди.

Ўзбекистоннинг амалдаги солиқ имтиёзлари ва инвесторлар, компания таъсисчилари ҳамда IT-мутахассислар учун Ўзбекистонда ишлаш жараёнини соддалаштирувчи уч йилгача амал қиладиган кўп марталик IT-виза имкониятлари тақдимоти конференциянинг муҳим нуқталаридан бирига айланди.

Кореянинг “LG CNS” ва “MK Soft/Softhub Global” каби компаниялари ўзларининг Ўзбекистондаги муваффақиятли иш тажрибаси ҳақида ўртоқлашиб, нима учун Ўзбекистонни IT-хаб сифатида танлаганликларини тушунтириб берди.

Бундан ташқари, тадбирда 3-6 ҳафта ичида якунланиши мумкин бўлган Ўзбекистонда бизнесни рўйхатдан ўтказиш жараёнининг қулайлиги тақдим этилди. Бу эса мамлакатда соддалаштирилган тартиб ва янги компаниялар учун давлат томонидан яратилган қулай шарт-шароитлар мавжудлигини кўрсатади.

Иштирокчилар Ўзбекистонда компания очиш тартиб-таомиллари, мамлакатдаги иқтисодий вазият, жумладан, ишлаш учун рухсатнома олиш ва IT-Парк томонидан бериладиган имтиёзлар ҳақида маълумот олишди.

Мамлакатимиз технологиялар бозорига Корея компанияларининг қизиқиши ортиб бораётгани, кореялик резидент компаниялар сони ва Ўзбекистондаги IТ-мутахассисларнинг салоҳияти бўйича фикр-мулоҳазалар билдирилди.

Асосий натижа сифатида Корея компаниялари, жумладан “Lotte Innovation”, “Eurasia va NewConTek Inc” томонидан Ўзбекистонга аутсорсинг қилиш имкониятлари кўриб чиқилди. Бундан ташқари, “BizData” ва “Croxhi” компаниялари “IT Park Uzbekistan” резиденти бўлиш режаларини эълон қилди.

Сеулда бўлиб ўтган мазкур тадбир Ўзбекистон ва халқаро компаниялар ўртасида муҳим алоқаларни ўрнатишга кўмаклашди ва бу келгуси ҳамкорлик учун замин яратди.

Н.Раҳмонова, ЎзА