Адлия вазири Акбар Тошқулов АҚШ – Ўзбекистон савдо палатаси раиси, “White & Case” юридик фирмасининг ҳамкори Керолин Лемм билан учрашди.
Маълумот учун: ““White & Case” юридик фирмаси АҚШнинг энг кучли юридик фирмаларининг “Big law” рейтингида биринчи бешталикка киради. Мазкур тузилма 31 давлатда ўз ваколатхоналари орқали фаолият юритувчи ҳамда Ўзбекистонда илк фаолиятини 1993 йил бошлаган йирик юридик фирмалардандир.
Учрашувда томонлар мамлакатнинг инвестициявий салоҳиятини мустаҳкамлаш, Тошкент халқаро тижорат судини ташкил этиш, вазирлик ходимларининг “White & Case” юридик фирмасининг Вашингтондаги офисида малакасини ошириш масалаларида атрофлича фикр алмашди.
Керолин Лемм Ўзбекистонда суд-ҳуқуқ ислоҳотлари ва инвестицион муҳитни яхшилаш борасида амалга оширилаётган ишлар ижобий натижа бераётганини эътироф этди.
Бунинг аниқ исботи 2023 йил Вашингтонда ўтказилган Ўзбекистон – Америка бизнес форумида иштирок этган 350 дан ортиқ америкалик инвесторнинг Ўзбекистонга сармоялар киритишга бўлган иштиёқида акс этган.
Учрашувда томонлар ўзаро ҳамкорликни ривожлантиришга келишиб олди.
Н.Абдураимова,
ЎзА