Олий Мажлис Қонунчилик палатасидаги “Адолат” СДП фракциясининг йиғилишида “Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида”ги қонун лойиҳаси муҳокамалар марказида бўлди.

Мазкур қонун лойиҳасида йўл ҳаракати хавфсизлиги қоидаларига тўлиқ амал қилиш ва уни бузганлик учун жавобгарлик қатъий белгиланиши ва турли жарималар қўлланилганда баъзи тушунмовчиликларнинг олдини олиш масаласига аниқлик киритиляпти.

Хусусан, юк автомобилларида йўлнинг четки чап қаторида ҳаракатланганлик учун, чапга бурилишда ёки қайрилиб олишда тенг аҳамиятли йўлдан қарама-қарши йўналишдан тўғрига ёки ўнгга ҳаракатланаётган транспорт воситаларига йўл бермаганлик учун ҳамда пиёдаларга лойқа сачратганлик учун жавобгарликни назарда тутувчи ўзгартириш киритилмоқда.

Таъкидланганидек, бу билан юк транспорт воситалари ҳайдовчилари томонидан оғир оқибатли йўл транспорт ҳодисалари келиб чиқишининг олди олинади ва йўл ҳаракати қоидаларига сўзсиз риоя этилишини таъминлайди. Шунингдек, тез тиббий ёрдамга ҳамда ёнғин-қутқарув бўлинмалари хизматига муҳтож фуқароларимизга ушбу ёрдамни сифатли ва зудлик билан етказилишини таъминлайди.

Бундан ташқари, скутер ва индивидуал ҳаракатланиш воситаларини бошқарувчи шахсларга нисбатан йўл ҳаракати қоидаларини бузганлик учун жавобгарлик муқаррарлиги белгиланяпти.

Депутатлар қонун лойиҳаси юзасидан партия сайловолди дастуридан келиб чиқиб, уни янада такомиллаштириш, пишиқ пухта ҳолатга келтириш бўйича бир қатор таклифлар берди.

 

М.Комилова, ЎзА