ФОТОРЕПОРТАЖ
Маълумки, Андижон, Навоий, Қашқадарё вилоятлари ва Қорақалпоғистон Республикасида “Тадбиркор аёл” халқаро ишбилармон аёллар ассоциацияси ҳамда “Winrock International” томонидан “Марказий Осиёда хавфсиз миграция” лойиҳаси амалга оширилган эди.
Лойиҳа АҚШ Халқаро Тараққиёт агентлиги (USAID) томонидан молиялаштирилган.
“Тадбиркор аёл” халқаро ишбилармон аёллар ассоциацияси ва унинг Қорақалпоғистон Республикаси ҳудудий бўлими бизнес-тренинглари томонидан Камбағалликни қисқартириш ва бандлик вазирлиги ҳузуридаги Ташқи меҳнат миграцияси агентлиги туман бўлимлари билан ҳамкорликда ушбу лойиҳа доирасида 2022 йил сентябрь ойидан 2023 йил сентябрь ойигача Хўжайли, Шуманай, Қўнғирот, Қанликўл, Кегейли, Бўзатов туманларида ва Нукус шаҳрида “Тадбиркорлик асослари ва хавфсиз миграция” мавзусида 3 кунлик 26 та тренинг ўтказилди. Лойиҳа доирасида бизнес-маслаҳатчилар томонидан 710 нафар иштирокчига бепул маслаҳат хизмати кўрсатилди.
Ушбу семинар иштирокчилари ўртасида ўтказилган кичик грант танловида бир нечта собиқ мигрант хотин-қизлар ғолиб бўлди. Улардан бири нукуслик Гулмира Узоқбергеновага лойиҳа доирасида сув тозаловчи ускуна топширилиб, у эндиликда “Қутли макон” маҳалла фуқаролар йиғини аҳолисини тоза ичимлик суви билан таъминлаб келмоқда. Кегейли тумани «Қумшунгул» овул фуқаролар йиғинидан Ойдиной Тўрабоевага эса нон маҳсулотлари тайёрлаши учун замонавий печ топширилди.
– Лойиҳа доирасида Оролбўйи ҳудудида 558 нафар (16 нафар одам савдоси жабрланувчиси, 197 нафар хориждан қайтган мигрант, 186 нафар мигрант оиласи аъзоси ва 159 нафар ишсиз) ёш ва хотин-қиз тадбиркорлик асосларига ўқитилди, – дейди “Тадбиркор аёл” халқаро ишбилармон аёллар ассоциацияси Қорақалпоғистон Республикаси ҳудудий бўлими раҳбари Назира Элибоева. – Лойиҳанинг асосий мақсади бизнес субъектларини очиш, уларга кичик грантлар ажратиш, янги иш ўринларини яратиш, шу билан одам савдосининг олдини олишга кўмаклашишдан иборат. Тренинг иштирокчилари ўз бизнесини йўлга қўйишга эришаётгани эса бизни янада хурсанд қилади.
Мақсад ҲАБИБУЛЛАЕВ (сурат), ЎзА