Бутан давлатида миллий парламент сайловларининг сўнгги босқичи бўлиб ўтмоқда. Ушбу сиёсий жараёнда кўтариладиган асосий мавзу иқтисодий масала бўлиб турибди.
Хитой ва Ҳиндистон ўртасида жойлашган ушбу кичик давлат 2008 йилдан кейин демократик жамият қуришга қадам қўйди. Айни пайтда мамлакатда 800 мингга яқин аҳоли истиқомат қилади.
Ярим миллионга яқин сайловчилар ноябрь ойидаги дастлабки турда ғалаба қозонган икки сиёсий партия – Бутан Тендрел партияси ва Халқ демократик партияси томонидан илгари сурилган 94 номзод орасидан парламент ёки Миллий ассамблеянинг 47 аъзосини танлаш ҳуқуқига эга.
Икки партия ҳам ўз сайлов дастурларида асосан иқтисодиётга эътибор қаратиб, 3 миллиард АҚШ долларлик иқтисодий натижага эришишни ваъда бермоқда.
COVID-19 пандемиясидан кейин мамлакат иқтисодиётининг асосий қисми туризмга таяниб қолганлиги айтилади.