Ózbekstan Respublikası Prezidentiniń pármanı

Bıyılǵı jıldıń 5-mart kúni Korrupciyaǵa qarsı gúresiw boyınsha milliy keńestiń keńeytilgen májilisinde belgilengen tiykarǵı wazıypalardıń orınlanıwın támiyinlew, sonday-aq, korrupciyaǵa qarsı gúresiw boyınsha jańa sistemanı engizip, bul máselege jámiyetshilik, parlament hám puqaralıq jámiyeti institutların keńnen mobilizaciyalaw maqsetinde qarar etemen:
1. Korrupciyaǵa qarsı gúresiw boyınsha milliy keńestiń 2025-jıl 5-martta ótkerilgen keńeytilgen májilisinde belgilengen tapsırmalardıń orınlanıwın támiyinlew boyınsha islep shıǵılatuǵın normativlik-huqıqıy hújjetler dizimi hám ámeliy ilajlar baǵdarlaması 1 hám 2-qosımshalarǵa muwapıq tastıyıqlansın.
Ministrlik hám uyımlardıń basshılarına usı Párman hám onıń qosımshalarında belgilengen wazıypalardı sapalı, óz waqtında hám sózsiz orınlanıwı boyınsha jeke juwapkershilik júklensin.
2. Korrupciyaǵa qarsı gúresiw boyınsha milliy keńes hár jılı aymaqlar kesiminde Qaraqalpaqstan Respublikası Ministrler Keńesi Baslıǵı, wálayatlar hám Tashkent qalası hákimleri, prokurorlar hám ishki isler uyımlarınıń baslıqları menen birgelikte korrupciyanıń aldın alıw, oǵan qarsı gúrseiw, sonıń ishinde, turmıslıq korrupciyanı saplastırıw, korrupciyaǵa keskin qatnasıqta bolıw ortalıǵın qáliplestiriw boyınsha «jol karta»sın tastıyıqlap, orınlanıwı ústinen qadaǵalawdı támiyinlesin.
3. Korrupciya hám jınayatshılıqqa qarsı gúresiwde parlamenttiń rolin túp-tiykarınan arttırıw maqsetinde Oliy Majlis palatalarına tómendegiler usınıs etilsin:
a) hár jılı byudjetten eń kóp qarjı alatuǵın úsh ministrlik hám uyımda korrupciyalıq faktorlardı anıqlap, olardı saplastırıw boyınsha usınıslar kirgiziw;
b) ministr hám hákimler lawazımına talabanlar tiyislisinshe Oliy Majlis Nızamshılıq palatası hám xalıq deputatları keńeslerinde kórip shıǵılıp atırǵanda olar tárepinen korrupciyanıń aldın alıw boyınsha anıq reje qorǵalıwına baylanıslı tártipti nızam hújjetlerinde belgilew;
v) xalıqaralıq tájiriybeni úyrenip, kibermákanda korrupciyaǵa qarsı nátiyjeli gúresiw boyınsha bekkem huqıqıy baza jaratıw boyınsha usınıslardı islep shıǵıw;
g) juwapker uyımlardıń wákillerinen ibarat jumısshı toparlar dúzgen halda «jınayatshılıqqa qarsı gúresiw hápteligi» dawamında hár aydıń 1-5- sánelerinde reje tiykarında «qızıl» kategoriyadaǵı máhállelerge barıp, jınayatlardıń kelip shıǵıw sebeplerin tereń tallaw, rayon (qala), Qaraqalpaqstan Respublikası, wálayatlar hám Tashkent qalasınıń prokurorları hám ishki isler uyımları baslıqlarınıń jumıs nátiyjeliligin arttırıw boyınsha usınıslar beriw hám rayon (qala) hám máhállelerde alǵa qoyılǵan xalıqshıl baslamalar tiykarında nızamlardı jetilistiriw boyınsha usınıslar islep shıǵıw.
4. Aymaqlardı kompleksli sociallıq-ekonomikalıq rawajlandırıw boyınsha sektorlar jumısı tómendegishe jańa tártip tiykarında jolǵa qoyılsın:
a) prokuror, ishki isler hám salıq uyımlarınıń basshıları sektorlar jumısı boyınsha júklengen wazıypalardan azat etiledi;
b) sektorlar jumısına bas ministrdiń orınbasarları hám Ózbekstan máhálleleri associaciyası hám onıń aymaqlıq bólimleri juwapker etip belgilenedi.
Ministrler Kabineti eki ay múddette sektorlardıń jańa tártip tiykarında jumıs islewi boyınsha Ózbekstan Respublikası Prezidenti qararınıń joybarın kirgizsin.
5. Ekonomikada korrupciyalıq faktorlardıń aldın alıw maqsetinde :
a) mámleketlik satıp alıwlarda satıp alınatuǵın tovar hám xızmetler bahası hám onıń ortasha bazar bahası arasındaǵı ayırmashılıqtıń eń kóp jol qoyılatuǵın shegarasınan shetke shıqqan halda satıp alıwlardı ámelge asırǵan lawazımlı shaxslar juwapkershilikke tartılatuǵını;
b) 2025-jıl 1-iyulden iri investiciya joybarlarında korrupciyaǵa qarsı xalıqaralıq standartlar hám iri aukcion shártlerin básekige shıdamlılıq ekspertizasınan ótkeriw tártibi engiziletuǵını;
v) «Ashıq-aydın qurılıs» milliy málimleme sisteması (keyingi orınlarda – «Ashıq-aydın qurılıs» sisteması)na qamtıp alıw jáne de arttırılıp, basqıshpa-basqısh xalıqaralıq shólkemlerdiń qatnasıwındaǵı joybarlarǵa engiziletuǵını belgilensin.
6. Usı Pármannıń 5-bántinde belgilengen tapsırmalardıń orınlanıwın nátiyjeli shólkemlestiriw maqsetinde:
a) Ekonomika hám qarjı ministrligi eki ay múddette:
1) mámleketlik aymaqlarda satıp alınatuǵın tovar hám xızmetlerdiń bahası boyınsha belgilengen talaplardı buzǵanı ushın juwapkershilikti názerde tutatuǵın nızam joybarın islep shıǵıp, kirgizsin;
2) Esap-sanaq palatası, Bas prokuratura janındaǵı Ekonomikalıq jınayatlarǵa qarsı gúresiw departamenti menen birgelikte byudjet hám byudjetten tısqarı qarjılar esabınan tiykarǵı qurallardı satıp alıw boyınsha talaplardı kúsheytsin;
3) Esap-sanaq palatası menen birgelikte mámleketlik buyırtpashılar tárepeinen tikkeley shártnamalar boyınsha satıp alınatuǵın tovarlardıń (jumıslar, xızmetler) túrlerin keminde eki ese qısqartıw boyınsha Ózbekstan Respublikası Prezidenti qararınıń joybarın kirgizsin;
b) Investiciyalar, sanaat hám sawda ministrligi, Básekini rawajlandırıw hám tutınıwshılardıń huqıqların qorǵaw komiteti Korrupciyaǵa qarsı gúresiw agentligi menen birgelikte úsh ay múddette iri investiciya joybarların korrupciyaǵa qarsı xalıqaralıq standartlar tiykarında bahalaw hám iri aukcion shártlerin básekige shıdamlılıq ekspertizasınan ótkeriw tártip-qaǵıydaların belgileytuǵın Húkimet qararınıń joybarın Ministrler Kabinetine kirgizsin;
v) 2025-jıl aqırına shekem Ekonomika hám qarjı ministrligi hám Investiciya, sanaat hám sawda ministrligi xalıqaralıq qarjı shólkemler menen birgelikte xalıqaralıq tender obektleri boyınsha sub jumıstı bólip alıp islewshilerdi «Ashıq-aydın qurılıs» sisteması arqalı tartıw bahası 2 million AQSh dollarǵa shekemgi xalıqaralıq qarjı shólkemleri esabınan qarjılandıratuǵın jergilikli tenderlerdi «Ashıq-aydın qurılıs» sistemasında ótkeriw hám xalıqaralıq tenderler boyınsha tartılǵan sırt el jumıstı bólip alıwshı shólkemlerdiń shártnama bahasınıń keminde 60 procentin óz kúshi menen orınlaw tártibin engiziw ilajların kórsin;
g) Qurılıs hám turaq jay kommunallıq xojalıǵı ministrligi «Ashıq-aydın qurılıs» sistemasın xalıqaralıq shólkemlerdiń qatnasıwındaǵı joybarlarǵa engiziw ushın bul sistemada tiyisli imkaniyatlardı jaratsın.
7. Ministrler Kabineti 2026-jıl 1-yanvarǵa shekem ministrlik hám uyımlar, jergilikli hákimlikler tárepinen kórsetiletuǵın barlıq mámleketlik xızmetlerdi rayon (qala) kesiminde xalıqtıń ózi bahalaytuǵın sistemanı engizsin.
Onda xalıq tárepinen «qanaatlandırarsız» dep bahalanǵan mámleketlik xızmetlerdi kórsetetuǵın ministrlik, uyım basshıları hám rayon t(qala) hákimleriniń jeke juwapkershiligi belilensin.
8. Ádillik ministrligi:
a) bir ay múddette Sanlı texnologiyalar ministrligi menen birgelikte jasalma intellekt tiykarında xalıqtıń kúndelikli turmısında ushırasatuǵın sorawlarına mobil telefon arqalı ápiwayı hám qolaylı túrde juwap alıw imkaniyatın beretuǵın onlayn platformanı iske qossın;
b) Sanlı texnologiyalar ministrligi menen birgelikte úsh ay múddette ministrlik hám uyımlar, jergilikli hákimlikler tárepinen kórsetilip atırǵan barlıq mámleketlik xızmetlerdi rayon (qala) kesiminde xalıqtıń ózi bahalaytuǵın jańa sistemanı engiziwdi názerde tutatuǵın Húkimet qararınıń joybarın islep shıqsın hám Ministrler Kabinetine kirgizsin;
v) úsh ay múddette Advokatlar palatası menen birgelikte puqaralarǵa sapalı yuridikalıq járdem kórsetiliwinde advokatlardıń jumısına tosqınlıq etip atırǵan faktorlardı saplastırıwǵa qaratılǵan nızam joybarın Ministrler Kabinetine kirgizsin.
9. Usı pármanda belgilengen wazıypalardıń óz waqtında hám tolıq orınlanıwın támiyinlew Ózbekstan Respublikasınıń Bas ministri A.N.Aripov hám Ózbekstan Respublikası Prezidentiniń keńesgóyleri D.B.Kadirov hám R.Q.Davletovlarǵa júklensin.

Ózbekstan Respublikası

Prezidenti Sh.MIRZIYoEV

Tashkent qalası,

2025-jıl 21-aprel