Ózbekstan Respublikası Prezidentiniń qararı

Shıǵısqa tán jańa jıl baslanatuǵın qutlı kún – Nawrız ásirler dawamında báhár, jaqsılıq, miyrip-shápáát, miynet hám dóretiwshilik belgisi sıpatında elimizdiń sociallıq-ruwxıylıq turmısında ornı oǵada úlken.
Bul qutlı bayram keyingi jılları Watanımızda ámelge asırılıp atırǵan “Insan qádiri ushın, insan baxıtı ushın”, degen ullı ideyaǵa sáykes bolıp, shın mánide ulıwma xalıqlıq bayramǵa aylandı hám elimizdiń barlıq qala hám awıllarında keńnen belgilenbekte.
Bul ullı máwsimniń ruwxı hám filosofiyasında sáwlelengen gumanizm, adamzattı pútkil jaratılıstıń gúltajı sıpatında qádirlew, ana watan hám tábiyattı qásterlep-saqlaw principlerin búgingi kúnde turmısımızda jáne de jarqın kózge taslanbaqta.
Áne usınday, jaqsı qádiriyatlar sebepli elimizde xalıq mápleri hám sociallıq qorǵanıwın támiyinlew, mútáj qatlamlardı qollap-quwatlaw, jámiyettiń hesh bir aǵzasın mehir hám itibardan shette qaldırmaw, qala hám awıllarımızdı abat etiw, jer hám suw resurslarınan, barlıq tábiyat jemislerinen aqılǵa uǵras paydalanıw tiykarǵı wazıypamızǵa aylanbaqta.
“Qorshaǵan ortalıqtı qorǵaw hám “jasıl ekonomika” jılı”nda belgilenetuǵın bıyılǵı Nawrız bayramı sol sebepli jańasha ruwx hám mazmun baǵıshlaydı.
Birlesken Milletler Shólkemi tárepinen xalıqaralıq bayram sıpatında tán alınǵan Nawrız bayramınıń kóp milletli jámiyetimizde tınıshlıq, doslıq hám awızbirshilik ortalıǵın bekkemlewdegi ornın hám áhmiyetin esapqa alıp hám bul bayramdı Jańa Ózbekstannıń búgingi potencialı hám ornına hár tárepleme múnásip túrde belgilew maqsetinde:
1. 2025-jılǵı Nawrız ulıwmaxalıqlıq bayramı elimizde “Qádiriyatlarıń máńgi bolsın, Nawrız!” degen bas ideya tiykarında ulıwma xalıqlıq seyilleri túrinde joqarı dárejede keńnen belgilensin.
2. Mádeniyat ministrligi, Jaslar isleri agentligi, Respublika Ruwxıy-aǵartıwshılıq orayı, Ózbekstan Jazıwshılar awqamı, Ózbekstan máhálleleri associaciyası hám “Nuraniy” qorınıń usınısına bola, 2025-jılǵı Nawrız ulıwma xalıqlıq bayramınıń ideologiyalıq-kórkem koncepciyası (keyingi orınlarda –Koncepciya) 1-qosımshaǵa muwapıq maqullansın.
3. 2025-jılǵı Nawrız ulıwma xalıqlıq bayramına tayarlıq kóriw hám onı ótkeriw boyınsha shólkemlestiriw komiteti (keyingi orınlarda –Shólkemlestiriw komiteti) quramı 2-qosımshaǵa muwapıq tastıyıqlansın.
-Shólkemlestiriw komiteti (A.N. Aripov) bir hápte múddette Tashkent qalası, Qaraqalpaqstan Respublikası hám wálayatlar orayları, barlıq qala, rayon hám awıllarda Koncepciya tiykarında islep shıǵılatuǵın Nawrız ulıwma xalıqlıq bayramın múnásip belgilew boyınsha shólkemlestiriw-ámeliy, mádeniy-aǵartıwshılıq hám úgit-násiyatlaw ilajları baǵdarlamasın tastıyıqlasın, sonday-aq, onıń ámelge asırılıwın támiyinlesin.
4. Orınlarda Nawrız ulıwma halıqlıq bayramına baǵıshlanǵan barlıq ilajlardı milliy qádiriyat hám dástúrlerimiz hám búgingi reformalarımızdıń mazmun-mánisine, Koncepciyada kórsetilgen tiykarǵı baǵdar hám usınıslarǵa sáykes túrde, joqarı dárejede shólkemlestiriw, olarda watanlaslarımızdıń belsene qatnasıwın támiyinlew maqsetinde tómendegi máselelerge ayrıqsha itibar qaratılsın:
-bayram ilajların tábiyattıń oyanıwı, insan hám tábiyat arasındaǵı baylanıs, ana watanǵa mehir hám itibar beretuǵın, watanlaslarımızdı búgingi tınısh ómirimizdi qádirlep, shúkirshilik sezimi menen jasawǵa iytermeleytuǵın tásirsheń mazmun hám túrde ótkeriw;
-elimizde ámelge asırılıp atırǵan tiykarǵı demokratiyalıq reformalar, xalqımızdıń kúndelikli turmısı hám dúnyaqarasında júz berip atırǵan unamlı ózgerisler Nawrızdıń adamgershilik hám inklyuzivlik mazmunına, ázeliy qádiriyat hám dástúrlerine sáykes ekenin kórsetiw;

-bıyılǵı Nawrız bayramı muqaddes Ramazan ayında belgileniwin inabatqa alıp, kekse áwlad wákillerin, atap aytqanda, Ekinshi jer júzilik urıs qatnasıwshıları hám miynet frontı nuraniyların hár tárepleme qádirlew, “Mehribanlıq”, “Qayır saqawat” hám “Múriwbet” úylerinde jasap atırǵan adamlar, sociallıq qorǵaw dápterlerine kirgizilgen hám járdemge mútáj insanlardıń jaǵdayınan xabar alıw, olar ushın bayram dasturxanın jayıw hám túrli qayırqomlıq ilajların ótkeriw;
“Jasıl mákan” ulıwma xalıqlıq joybarında belgilengen ilajlardı ámelge asırıw, bayram aldınan barlıq aymaqlarda, kóshe, máhálle, rayon hám qalalarda abadanlastırıw hám kóklemzarlastırıw akciyaların, ulıwma xalıqlıq shembiliklerin ótkeriw;
-jámiyetimizde jasap atırǵan milletleraralıq doslıq hám tatıwlıq ortalıǵın bekkemlew maqsetinde elimizde jasap atırǵan túrli millet hám xalıqlar wákilleriniń milliy úrp-ádetleri, dástúr hám qádiriyatların keńnen kórsetiw;
-bayram ilajları dawamında ónermentshilik kórgizbeleri, milliy sport túrleri boyınsha jarıslar ótkeriw, kitap kórgizbeleri, arzanlastırılǵan awıl xojalıǵı hám azıq-awqat ónimleri yarmarkaları, kóshpeli sawda dúkanların shólkemlestiriw, kóklem taǵamların tayarlaw hám bul boyınsha kórgizbeli sawda hám tanlawlardı shólkemlestiriw;
-barlıq qala hám awıllarda ótkeriletuǵın bayram dástúrlerinde, ǵalaba xabar qurallarında Nawrız bayramınıń tariyxı, hár bir aymaqta onı belgilewge baylanıslı úrp-ádetlerin keńnen úgit-násiyatlaw;
-Tashkent qalasındaǵı “Jańa Ózbekstan” kompleksinde ayrıqsha baǵdarlama tiykarında xalıq seyillerin shólkemlestiriw.
5. Mádeniyat ministrligi (O.Nazarbekov) Respublika Ruwxıy-aǵartıwshılıq orayı (O.Hasanov), Jazıwshılar awqamı (S.Saidov) menen birgelikte bir hápte múddette Koncepciyaǵa muwapıq Tashkent qalasında Nawrız bayramına baǵıshlap ótkeriletuǵın teatrlastırılǵan tiykarǵı koncert tamashasınıń baǵdarlaması hám scenariysin islep shıqsın.
6. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri:
a) bir hápte múddette Nawrız ulıwma xalıqlıq seyillerin ótkeriw boyınsha tómendegilerdi názerde tutatuǵın aymaqlıq ilajlar baǵdarlamasın islep shıqsın hám tastıyıqlasın:
-ulıwma xalıqlıq seyiller shólkemlestiriletuǵın tiykarǵı maydanlar, kóshe hám qıyabanlardı milliy túrde bezew;
-usı seyil hám tamashalardı jergilikli tájiriybeli scenarist hám rejissyorlar, kompozitorlar, baletmeysterler, saxna xudojnikleri, talantlı jas dóretiwshiler, folklor kórkem óneri wákilleri menen birgelikte joqarı kórkemlik dárejede tayarlaw ilajların kóriw;
-bayram baǵdarlamaların hám ǵalabalıq tamashalardı tayarlawda, kósheler, maydan hám qıyabanlardı bezewde tájiriybeli qánigelerden ibarat dóretiwshi toparlardı keńnen tartsın;
v) barlıq ilajlar jámiyetlik qáwipsizlik talaplarına qatań ámel etilgen halda ótkeriliwin támiyinlesin.
7. Ótkeriletuǵın bayram ilajlarınıń qárejetleri:
Tashkent qalasında – respublika byudjeti hám Tashkent qalası jergilikli byudjet qarjıları esabınan teńdey úleslerde;
Qaraqalpaqstan Respublikası hám wálayatlarda – tiyisli jergilikli byudjetler hám qáwenderlik qayırqomlıqları esabınan qaplanatuǵını belgilep qoyılsın.
8. Ózbekstan Milliy málimleme agentligi, Ózbekstan Milliy teleradiokompaniyası, “Dunyo” málimleme agentligi hám basqa ǵalaba xabar qurallarına Nawrız ulıwma xalıqlıq bayramına tayarlıq kóriw hám onı ótkeriw boyınsha ámelge asırılıp atırǵan jumıslardı hár tárepleme sáwlelendirip barıw usınıs etilsin.
9. Usı qarardıń orınlanıwın qadaǵalaw Ózbekstan Respublikası Bas ministri A.N. Aripov hám Ózbekstan Respublikası Prezidenti Administraciyası Sociallıq rawajlanıw departamenti basshısı O. Q. Abduraxmanovqa júklensin.

Ózbekstan Respublikası
Prezidenti Sh.MIRZIYoEV