Turizm komitetinde Qazaqstannıń “Air Astana” aviakompaniyasınıń wákilleri menen sóylesiwler bolıp ótti. Ushırasıwda Ózbekstan menen Qazaqstan arasındaǵı hawa qatnawların keńeytiw, jańa jónelisler ashıw hám ámeldegi párwazlar sanın arttırıw máseleleri dodalandı.
Ózbekstanda turizm infrastrukturasın jedel rawajlandırıw, zamanagóy miymanxanalar, mádeniy-kewilashar orınlar hám transport-logistika qolaylıqların keńeytiw baǵdarında ámelge asırılıp atırǵan jumıslar haqqında maǵlıwmat berildi.
Atap aytqanda, Ózbekstanǵa kelip atırǵan sırt elli turistlerdiń mámleketimizdiń mádeniy-tariyxıy miyrasına, sonıń ishinde, Samarqand, Buxara hám Xiywa sıyaqlı qalalarǵa qızıǵıwshılıǵı artıp atırǵanı atap ótildi. Aviaqatnawlardıń keńeytiliwi Ózbekstanda ashılıp atırǵan jańa turizm obektleri, zamanagóy muzey-kórgizbe kompleksleri, rekonstrukciyalanǵan tariyxıy ansambller hám qurılǵan zamanagóy turistlik infrastruktura menen tanısıw imkaniyatın jaratadı.
Sóylesiwlerdiń juwmaǵında eki tárepleme birge islesiw sheńberinde sóylesiwdi dawam ettiriw hám anıq usınıslardı islep shıǵıw boyınsha kelisimge erisildi.

Muhayyo Toshqoraeva, ÓzA