Oliy Majlis Nızamshılıq palatası Spikeriniń orınbasarı Rahimjon Hakimovtıń Konrad Adenauer atındaǵı qordıń Oraylıq Aziya boyınsha regionallıq wákilxanasınıń basshısı Andre Algermissen menen ushırasıwı bolıp ótti.
Atap ótilgenindey, sońǵı jılları Ózbekstan menen Germaniya arasındaǵı kóp tárepleme qatnasıqlar – innovaciya hám texnologiyalar, “jasıl” ekonomika, alternativ energetika, transport hám logistika, bilimlendiriw hám mádeniyat tarawlarında rawajlanıp barmaqta.
Sonday-aq, eki tárepleme qatnasıqlar sheńberinde siyasiy hám ekonomikalıq tarawdaǵı sóylesiw jedelleskeni unamlı bahalandı.
Óz gezeginde, A.Algermissen keyingi jılları Prezident Shavkat Mirziyoevtiń basshılıǵında Ózbekstanda barlıq tarawda ámelge asırılıp atırǵan reformalar, keń kólemli jańalanıwlardı atap ótti.
Sonday-aq, búgingi kúnde Parlamentlik izertlewler institutı, Jaslar parlamenti menen nátiyjeli birge islesiw jolǵa qoyılǵanı, tarawǵa jańa ámeliyat hám mexanizmlerdi engiziwde bir qatar ámeliy jumıslar islenip atırǵanlıǵı atap ótildi.
Sóylesiw waqtında óz-ara paydalı birge islesiwdi rawajlandırıw hám birgeliktegi joybarlardı ámelge asırıw, atap aytqanda, búgingi kúndegi parlamentarizmniń áhmiyetli máselelerin úyreniw, aldınǵı sırt el ámeliyatınıń jetiskenliklerin úyreniwge kelisip alındı.
Sonıń menen birge, parlament jumısında jasalma intellektti qollanıw, bul baǵdarda Germaniya tájiriybesin úyreniw boyınsha birge islesiw boyınsha pikir alısıldı.

M.Komilova, ÓzA