Mámleketimiz basshısınıń 2026-jıl 5-yanvardaǵı “Respublika máhállelerinde qáwipsiz ortalıqtı jaratıw baǵdarında birden-bir mánzilli islesiw sistemasın engiziwge qaratılǵan qosımsha ilajlar haqqında”ǵı 1-sanlı qarardı ámeliyatqa engiziw maqsetinde Qaraqalpaqstan Respublikası prokurorı Sh.Aminov basshılıǵındaǵı respublikalıq jumısshı topar tárepinen Nókis qalasındaǵı “Shımbay shayxana” MPJda úyreniw jumısları alıp barıldı.
Úyreniw procesinde “máhálle jetiligi” tárepinen Mámleketimiz basshısı tárepinen usı jılı 27-yanvar kúni ótkerilgen videoselektor májilisinde berilgen tapsırmalar hám qararlardıń orınlanıwın támiyinlew maqsetinde islep shıǵılǵan “Jol kartaları”nda belgilengen wazıypalardıń nátiyjeli shólkemlestirilgenine ayrıqsha itibar qaratıldı.
Sonday-aq, “Jol kartası”nıń bántlerin máhálleniń kriminogen jaǵdayına muwapıqlastırıw, ayrıqsha kategoriyadaǵı shaxslar menen jumıslardı nátiyjeli shólkemlestiriw, shańaraqlıq zorlıqtıń aldın alıw boyınsha profilaktikalıq ilajlardı kúsheytiw, máhálle jasları hám hayal-qızlar arasındaǵı jınayatshılıqtı tolıq saplastırıw ilajların kóriw boyınsha qatań tapsırmalar berildi.
Bunnan soń, máhálle aymaǵında túngi xızmetke tartılǵan xızmetkerlerge sergeklikti arttırıw, túngi waqıtta jumıs alıp barıp atırǵan asxana, kafe, kompyuter oyın xanaları hám basqa da xızmet kórsetiw orınlarında reyd ilajların kúsheytiw, más halda transport quralın basqarıw jaǵdayların anıqlaw hám saplastırıw boyınsha kórsetpeler berildi.

Qaraqalpaqstan xabar agentligi