Qaraqalpaqstan Respublikası Pedagogikalıq sheberlik orayınıń direktorı G.Kojabaeva mektepke shekemgi bilimlendiriw shólkemleriniń tıńlawshıları menen ashıq sáwbetlesiw ótkerdi.
Ashıq pikirlesiwdiń tiykarǵı maqseti – bilimlendiriw procesin jetilistiriw, tıńlawshılardıń usınıs hám baslamaların tıńlaw, oqıw procesiniń nátiyjeliligin arttırıw hám ashıq pikirlesiw ortalıǵın jaratıw.
Atap ótilgenindey orayda pedagoglar eń sońǵı texnologiyalar menen úskenelengen auditoriyalarda bilim almaqta. Kurslar 100 saatlıq oqıw baǵdarlaması tiykarında shólkemlestiriledi. Baǵdarlama sociallıq kónlikpeler, kásiplik kompetenciya hám tálim-tárbiya procesindegi innovaciyalıq jantasıwlardı óz ishine aladı.
«Aqlvoy» mobil avtobusı da alıs hám shetki aymaqlardaǵı pedagoglar ushın mobil qánigelik arttırıw xızmetin atqarıp, bul avtobus 14 orınlıq, 1 noutbuk, interaktiv monitor hám Wi-Fi menen támiyinlengen, pedagoglardıń jumıs ornınan uzaqlaspaǵan halda “Metodikalıq sheberlik saatları”nda qatnasıwına imkaniyat jaratadı. Pedagoglarǵa STEAM texnologiyasın qollanıw, interaktiv oyınlar hám zamanagóy didaktikalıq qurallar menen islew metodikaları úyrenilmekte.
Sonday-aq, tıńlawshılardıń bos waqtın mazmunlı ótkeriw maqsetinde muzeyler, teatrlarǵa sayaxatlar hám túrli tańlawlar shólkemlestirilmekte.
Ushırasıw dawamında tıńlawshılar oqıw sabaqlarına qatnasıwı, sabaqlarǵa bolǵan qızıǵıwshılıǵı, ózlestiriw procesindegi tájiriybeleri hám ámeliy sabaqlardıń áhmiyeti boyınsha pikir-usınısların bildirdi.
Ushırasıwda bilimlendiriwdiń sapasın arttırıwǵa qaratılǵan pikir-usınıslar bildirilip, qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi