Ózbekstan mádeniyat ministriniń birinshi orınbasarı Bahodir Ahmedov basshılıǵındaǵı delegaciya xızmet saparı menen Qatarda boldı.
Xızmet saparı dawamında eki mámleket mádeniyat tarawındaǵı birge islesiwdi rawajlandırıw, mádeniyat shólkemleriniń jumısı menen tanısıw jáne sırt el tájiriybesi tiykarında milliy mádeniyatımızdı jáne de keńeytiw maqsetinde bir qatar ushırasıwlar shólkemlestirildi.
Atap aytqanda, Doxa qalasında jaylasqan “Qatar mádeniyat awılı” kompleksine barıp, komplekstiń jumısı menen tanıstı. “Qatar mádeniyat awılı” kompleksi Doxa qalasındaǵı eń úlken mádeniyat hám kórkem óner oraylarınan biri bolıp, mádeniyat, kórkem óner, teatr, arxitektura, sanlı tájiriybeler hám xalıqaralıq ilajlardı bir jerde jámlegen siyrek ushırasatuǵın orın esaplanadı. Komplekste amfiteatr, 3 kórkem óner muzeyi, opera úyi, drama teatrı, túrli milletlerdiń taǵamları hám bar restoranlar jumıs alıp barmaqta. Bul komplekste Qatar xalıqaralıq kórkem óner festivalı, Qatar xalıqaralıq arab atları festivalı, bayraq hám áskeriy muzıka festivalı sıyaqlı iri ilajlar bolıp ótedi.
Xızmet saparı dawamında Bahodir Ahmedov basshılıǵındaǵı delegaciya aǵzaları Qatar mámleketlik filarmoniyası orkestr basshısı Kurt Meyster menen ushırastı.
Ushırasıwda eki mámleket filarmoniyaları arasında birge islesiw, atap aytqanda, Ózbekstan hám Qatarda shólkemlestiriletuǵın xalıqaralıq mádeniy ilajlarda turaqlı qatnasıw, qospa koncert baǵdarlamaların shólkemlestiriw, sonday-aq, eki mámleket filarmoniyaları arasında birge islesiw kelisimine qol qoyıw arqalı anıq ilajlar rejesin shólkemlestiriw máseleleri dodalandı.
Sonıń menen birge, delegaciya aǵzaları hám Doxa qalasında jasap atırǵan watanlaslar menen ushırasıw bolıp ótti.
Ózbekstan mádeniyat ministriniń birinshi orınbasarı Bahodir Ahmedov hám Qatar mádeniyat ministrligi Xalıqaralıq birge islesiw departamentiniń direktorı Nosir al Malik arasında birge islesiw ushırasıwı shólkemlestirildi. Ushırasıwda Bahodir Ahmedov tárepinen ózbek milliy maqam kórkem ónerin Qatarda keńnen úgit-násiyatlaw, qatarlılar ushın maqam kesheleri hám sheberlik sabaqların shólkemlestiriw, birgeliktegi mádeniy ilajlar hám gastrol saparların ámelge asırıw usınıs etildi.
Óz gezeginde Nasir al Malik Qatar Ózbekstan Respublikası Mádeniyat ministrligi juwapkerleri tárepinen usınıs etilgen joybarlardı qollap-quwatlaw boyınsha tiyisli ilajlar kóriletuǵının málim etti.

N.Usmonova, ÓzAnıń xabarshısı