Evropada qáwipsizlik hám birge islesiw shólkeminiń (EQBSh) adam sawdasına qarsı gúresiw boyınsha arnawlı wákili Keri Jonstonnıń Ózbekstanǵa saparı sheńberinde Tashkent qalasında huqıq qorǵaw uyımları hám taraw qánigeleri ushın eki kúnlik oqıw kursı shólkemlestirildi.
Huqıqtı qorǵaw akademiyasında bolıp ótken trening sanlı texnologiyalardı qollanǵan halda ámelge asırılıp atırǵan ekspluataciyaǵa qarsı gúresiw temasına baǵıshlandı. Oqıw kurslarında Bas prokuratura, IIM, Sanlı texnologiyalar ministrligi, kadrlardı tayarlaw institutları, sonday-aq, balalardı qorǵaw hám miynet qadaǵalawı ushın juwapker uyımlardıń wákilleri qatnastı.
– Adam sawdası qurbanların qorǵaw hám adam sawdasınıń aldın alıw ushın kúshli siyasat penen birge, maman qánigeler kerek, – dedi K. Jonston. – Ózbekstanda ámelge asırılıp atırǵan reformalar bunıń ushın bekkem tiykar jaratıp, sanlı texnologiyalardı paydalanǵan halda adam sawdasına qarsı gúresiw máseleleri boyınsha qánigelerdiń mamanlıǵın arttırıw baǵdarında kórilip atırǵan maqsetli ilajlar minnetlemelerdi nátiyjeli ámeliy háreketke aylandırıwǵa járdem bermekte.
Treningler EQBShnıń texnologiyalardı paydalanǵan halda adam sawdası jaǵdayların tergew boyınsha oqıw baǵdarlamasına tiykarlanǵan bolıp, bul baǵdarlama qatnasıwshılarǵa xalıqtıń ázzi toparlarına tásir kórsetiw ushın barǵan sayın kóp qollanılıp atırǵan ekspluataciya usılların anıqlaw, tekseriw hám aldın alıw boyınsha zárúr bilimlerdi beriwge mólsherlengen.
– Oqıw kursı huqıq qorǵaw uyımları xızmetkerlerinde proaktiv onlayn tergewler ótkeriw, ashıq málimleme derekleri menen islesiw hám jábirleniwshilerdiń máplerine qaratılǵan qatnas boyınsha anıq kónlikpelerdi qáliplestirip, huqıq qorǵaw uyımları oqıw orınlarına texnologiyalardı paydalanǵan halda adam sawdasına qarsı gúresiw ushın oqıtıw usılların beyimlestiriw imkaniyatın beredi, – dedi K. Jonston.
Qatnasıwshılar texnologiyalardı paydalanǵan halda adam sawdası jaǵdayların tergew boyınsha tereń bilim alıp, qánigelerdi tayarlawda tergew usılları, anıq mısallar tiykarında oqıtıw hám jábirleniwshilerdiń máplerine baǵdarlanǵan qatnastı úylestiriwdi úyrendi. Olar bul modullerdi huqıq qorǵaw uyımlarınıń xızmetkerleri menen birge, kursantlarǵa da úyretiwi múmkin. Bul bolsa huqıq qorǵaw uyımlarınıń onlayn jallaw usılların anıqlaw, sanlı ekspluataciyanı tergew hám virtual mákanda jınayatshılardı qadaǵalaw usıllarınıń aldın alıw boyınsha bilim hám kónlikpelerin arttırıw imkaniyatın beredi.
EQBShnıń Ózbekstandaǵı joybarlarınıń koordinatorı Antti Karttunen xızmetkerlerdi tayarlaw hám zamanagóy tergew quralların engiziwge qaratılǵan investiciyalar mámlekettiń jınayatlardıń aldın alıw, jábirleniwshilerdi qorǵaw hám jańa sanlı qáwip-qáterlerge juwap beriw potencialın arttıratuǵının atap ótti.
EQBSh arnawlı wákiliniń mámleketimizge saparı sheńberinde adam sawdasına qarsı gúresiw tarawındaǵı baslamalardıń bir qatar joqarı mártebeli qatnasıwshıları menen ushırasıwlar da bolıp ótti. Keri Jonston Ózbekstannıń bul tarawdaǵı tabıslı tájiriybesin atap ótip, bul baǵdardaǵı háreketler, sonıń ishinde, keyingi nızamshılıq reformaları – Jınayat kodeksine kirgizilgen adam sawdası ushın jazanı kúsheytetuǵın ózgerisler hám balalardı zorlıqtıń barlıq túrlerinen qorǵawǵa qaratılǵan jańa nızamdı qollap-quwatlaytuǵının bildirdi.

Aziza Alimova, ÓzA