Qaraqalpaqstan Respublikası Sudınıń baslıǵı K.Tarixovtıń basshılıǵında videokonferencbaylanıs rejiminde ótkerilgen ruwxıy-aǵartıwshılıq saatında tiykarǵı itibar Ózbekstan Respublikası Joqarǵı sudınıń baslıǵı tárepinen qabıl etilgen biyliklerdiń áhmiyetine qaratıldı.
Sonıń ishinde, “Sud imaratlarına kiriw-shıǵıwda málimleme qáwipsizligin támiyinlew, korrupciyanı keltirip shıǵaratuǵın jaǵdaylardıń aldın alıw hám miynet nátiyjeliligin arttırıw haqqında”ǵı hám “Sudya hám sud apparatı xızmetkerleri arasında kitapqumarlıq mádeniyatın rawajlandırıw hám kitap oqıwǵa qızıǵıwshılıǵın arttırıw ilajları haqqında”ǵı biyliklerde belgilengen wazıypalar hár tárepleme túsindirildi. Sonday-aq, buyrıqtıń orınlanıwı sheńberinde sud imaratlarında málimleme qáwipsizligin támiyinlew, jumıs processlerin tártipke salıw hám nátiyjeliligin arttırıwǵa qaratılǵan ilajlar belgilep alındı. Ótkerilgen ruwxıy-aǵartıwshılıq saatında sudta “Kitap múyeshi” shólkemlestirilip, háptede bir kún kitapqumarlıq kúni sıpatında belgilendi.
Ilajda sudya hám xızmetkerlerdiń ádep-ikramlılıq qaǵıydalarına ámel etiwi, qarar qabıl etiwde ashıq-aydınlıq hám qalıslıqtı támiyinlew máseleleri de dodalandı.
Sonıń menen birge, Ózbekstan Sudyaları associaciyasınıń baslıǵı U.Mingbaev tárepinen “Qáwipsiz ortalıq hám jámiyetlik qáwipsizlikti támiyinlewge qaratılǵan ámeliyat” atamasındaǵı bayanatı oqıp esittirilip, profilaktikalıq ilajlardıń áhmiyeti ayrıqsha atap ótildi.
Joqarıda atap ótilgen hújjetlerdiń orınlanıwın támiyinlew – sistemalı, ashıq-aydın hám nátiyjeli sud xızmetiniń áhmiyetli kepili bolıp esaplanadı.

Qaraqalpaqstan xabar agentligi