Ataqlı mámleketlik hám jámiyetlik ǵayratker, belgili miynet veteranı Qállibek Kamalov usı jıl 11-fevral kúni 100 jasında qaytıs boldı.
Qállibek Kamalov 1926-jılı 18-martta Qaraqalpaqstannıń Taxtakópir rayonında tuwıldı. Orta mektepti tamamlap, áskeriy xızmetti ótep bolǵannan soń, 1955-jılı Nókis mámleketlik universitetin tamamladı. Miynet jolın Qaraqalpaqstan Respublikası jaslar komitetiniń xatkeri lawazımınan baslap, keyin ala Ministrler Keńesi baslıǵınıń orınbasarı, Nókis qalalıq atqarıw komitetiniń baslıǵı bolıp isledi.
Joqarı shólkemlestiriwshilik qábiletine iye bolǵan Q.Kamalov Qaraqalpaqstan Respublikası kommunal xojalıǵı ministri, jol transportı hám avtomobil jolları ministri, Qaraqalpaqstan partiya komitetiniń xatkeri lawazımlarında nátiyjeli jumıs alıp bardı.
Pútkil ómirin hám miynet jolın ózi tuwılıp ósken eldiń rawajlanıwına baǵıshlaǵan sheber basshı 1959-1963-jıllarda Qaraqalpaqstan Respublikası Ministrler Keńesiniń baslıǵı, 1963-1984-jıllarda Qaraqalpaqstan Respublikası partiya komitetiniń birinshi xatkeri, Respublika jetekshisi sıyaqlı juwapkershilikli wazıypalarda jankúyerlik kórsetip, aymaqtı sociallıq-ekonomikalıq rawajlandırıw, túrli taraw hám tarmaqlarda jumıstı zaman talapları tiykarında jolǵa qoyıw baǵdarında pidákerlik penen miynet etti.
Qállibek Kamalov 1984-1986-jılları talantlı diplomat sıpatında da nátiyjeli jumıs alıp bardı.
Ol uzaq jıllıq kóp qırlı miynet jolı dawamında bay bilim hám tájiriybesi, basshılıq potencialı, joqarı adamgershilik pazıyletleri, Watanımızǵa sheksiz mehri hám sadıqlıǵı menen el-xalıqtıń júreginen tereń orın alǵan ullı insan edi. Onıń tikkeley basshılıǵında Qaraqalpaqstan Respublikasın hár tárepleme rawajlandırıw, qıyın ıqlım sharayatında paxtashılıq, ǵálleshilik, sharwashılıq hám basqa da awıl xojalıǵı tarmaqların, sonday-aq, sanaat hám óndiristi rawajlandırıw, xalıqtıń turmıs dárejesin jaqsılaw boyınsha salmaqlı jumıslardı ámelge asırıldı.
Qállibek Kamalov sońǵı jılları Qaraqalpaqstan Respublikası nuranıylar jámiyetlik keńesiniń baslıǵı sıpatında kekseler hám nuranıylardı qollap-quwatlaw, olardıń máplerin júzege shıǵarıw, jámiyette tınıshlıq, miyrim-shápáát, keńpeyillik hám awızbirshilik ortalıǵın bekkemlew, jaslardı Watanǵa muhabbat, milliy hám ulıwmainsanıylıq qádiriyatlarǵa húrmet ruwxında tárbiyalaw baǵdarındaǵı jumıslarǵa belsene qatnasıp keldi.
Qállibek Kamalovtıń mámleketimiz hám xalqımız aldındaǵı úlken xızmetleri ılayıqlı sıylıqlandı. Ol “Shuhrat” medalı hám “El-yurt hurmati” ordeni menen sıylıqlanǵan edi.
Ataqlı mámleketlik hám jámiyetlik ǵayratker, jaslardıń mehriban ustazı, haq kewil hám kishipeyil insan Qállibek Kamalovtıń esteligi júreklerimizde máńgi saqlanıp qaladı.

Sh.Mirziyoev, T.Norboeva, N.Ismoilov,
A.Aripov, A.Orınbaev, S.Turdiev