Jańa nızamshılıqqa tiykarlanıp bir jıllıq mektepke tayarlaw toparlarınıń bilimlendiriw baǵdarlaması májbúriy ulıwma orta bilimlendiriwdiń dáslepki basqıshı sıpatında kirgiziliwi hám mektepke shekemgi bilimlendiriw sistemasında oyınǵa tiykarlanǵan bilimlendiriw baǵdarınıń engiziliwi rejelestirilmekte.
Xosh, balalardı mektepke tayarlawǵa qamtıp alıw dárejesin 100 procentke jetkeriw ushın házir qanday ámeliy jumıslar baslanǵan?
Mektepke shekemgi hám mektep bilimlendiriwi ministrligi baspasóz xızmetiniń basshısı Dilfuza Sobirovanıń maǵlıwmatlarına bola, 2022-2023-jıllarda 6 jasar balalardı mektepke shekemgi tayarlaw sisteması menen qamtıp alıw dárejesin 90 procentke, 2024-2025-oqıw jılı juwmaǵına shekem 100 procentke jetkeriw belgilengen edi.
Xalıqtıń keskin demografiyalıq ósiwi, sonday-aq, mámleketimizdegi jańa óndirislik obektlerdiń iske qosılıwı hám sırt mámleketlerde jumıs islep atırǵan puqaralarımızdıń óz jasaw mánzillerine qaytıwı nátiyjesinde mektepke shekemgi bilimlendiriw shólkemleriniń quwatlılıǵına salıstırǵanda balalar sanınıń artıp ketiwi mektepke shekemgi bilimlendiriwdiń alternativ túrlerin jaratıw zárúrligin júzege keltirdi.
Alternativ túr sıpatında Dáslepki rawajlanıw orayları hám alıs aymaqlarda bolsa “Aqlvoy” mobil toparları shólkemlestirilmekte.
Joqarıdaǵı ózgerisler, atap aytqanda, xalıqtıń sanınıń keskin ósiwin esapqa alǵan halda 2030-jılǵa shekem balalardı mektepke tayarlaw toparları menen tolıq qamtıp alıw názerde tutılǵan.
Belgilengen tártipke bola, bir jıllıq mektepke tayarlaw toparları ulıwma orta bilimlendiriwdiń dáslepki basqıshı sıpatında kirgizildi hám 2027-2028-oqıw jılınan baslap 6 jasar balalarǵa mektepke tayarlıqtan ótkenligi haqqında mámleketlik úlgidegi elektron sertifikat beriliwi jolǵa qoyılmaqta.
Bunnan tısqarı, mámleketlik emes mektepke shekemgi bilimlendiriw shólkemleri tarmaǵın keńeytiw ushın engizilip atırǵan jeńillikler de orınlarda qosımsha orınlar jaratıw imkaniyatın beredi.

Muhayyo Toshqoraeva, ÓzA