Ózbekstan Respublikası Prezidenti Shavkat Mirziyoev Pakistan Islam Respublikası Bas ministri Shahboz Shariftiń mirát etiwine bola 5-6-fevral kúnleri mámleketlik sapar menen usı mámlekette boladı.
Baǵdarlamaǵa muwapıq, Islamabadta Pakistan Prezidenti Asif Ali Zardoriy, Bas ministr Shahboz Sharif, Qorǵanıw kúshleri Joqarı Bas Sárkardası – Qurallı Kúshlerdiń qurǵaqlıqtaǵı áskerleri sárkardası, feldmarshal Asim Munir menen sóylesiwler jáne Strategiyalıq birge islesiw keńesiniń birinshi májilisin ótkeriw rejelestirilgen.
Ózbekstan menen Pakistan arasındaǵı strategiyalıq sheriklik hám kóp qırlı birge islesiw qatnasıqların jáne de tereńlestiriw máseleleri joqarı dárejedegi sóylesiwler kún tártibiniń orayında boladı.
Siyasiy sóylesiwdi keńeytiw, eki mámleket húkimetleri, parlamentleri, isbilermen toparları hám aymaqları arasındaǵı baylanıslardı bekkemlewdiń áhmiyetli tárepleri hár tárepleme kórip shıǵıladı.
Tárepler tovar almasıwdı arttırıwǵa, sanaat, transport hám infrastruktura, turizm tarawlarındaǵı birge islesiw joybarların alǵa qoyıwǵa jáne mádeniy-gumanitarlıq baylanıslardı dawam ettiriwge ayrıqsha itibar qaratadı.
Xalıqaralıq hám regionallıq áhmiyetke iye aktual máseleler boyınsha pikir alısıladı.
Sóylesiwlerdiń juwmaǵında Birgeliktegi deklaraciya hám tiykarǵı tarawlar boyınsha kelisimlerdiń salmaqlı toplamına qol qoyılıwı kútilmekte.
Ózbekstan Prezidenti eki mámleket jetekshi isbilermen toparları wákilleriniń birgeliktegi biznes forumında da qatnasadı.

ÓzA