Prezident Shavkat Mirziyoevtiń Oliy Majlis hám Ózbekstan xalqına jollaǵan Múrájatı Pakistanda urdu tilinde kitap tárizinde basıp shıǵarıldı. Bul haqqında “Dunyo” málimleme agentligi xabar berdi.
Mámleketimiz Sırtqı isler ministrligi hám Islamabadtaǵı elshixanamızdıń baslaması menen ámelge asırılǵan bul joybardan gózlengen maqset usı tuwısqan mámlekettegi urdu tilinde sóylesetuǵın xalıqqa elimizdegi reformalar, mámleket hám jámiyettiń rawajlanıw strategiyaları, Ózbekstan jetekshisiniń aldınǵı siyasiy baslamaları haqqında tolıq hám anıq maǵlıwmat jetkeriw bolıp esaplanadı.
Pakistan ekspertleriniń atap ótiwinshe, Múrájattıń urdu tiline awdarılıwı mámleketlerimiz, xalıqlarımız arasındaǵı siyasiy hám mádeniy birge islesiwdi bunnan bılay da rawajlandırıw jolında áhmiyetli qádem bolıp esaplanadı.
Basılım Pakistan jámiyetlik-siyasiy, isbilermenlik hám akademiyalıq toparları jáne keń jámiyetshilik wákilleri arasında tarqatıladı.

ÓzA