Xoshamet hám itibar jáne de nátiyjeli miynet, dóretiwshilik izleniske iytermeleydi. «Jańa Ózbekstan juldızları» milliy sıylıǵı kórkem óner xızmetkerlerin mine usınday joqarı sheklerge qaray shaqırıp kiyatırǵan sıylıqlardan esaplanadı.
Paytaxtımızdaǵı «Renessans Hall» kompleksinde mádeniyat hám kórkem óner tarawındaǵı abıraylı joybarlardan biri bolǵan «Jańa Ózbekstan juldızları» milliy sıylıǵınıń jeńimpazların sıylıqlawǵa baǵıshlanǵan ilaj ózgeshe ruwxta hám keń kólemde ótkerildi.
Tórtinshi márte shólkemlestirilgen bul ilajǵa kóplegen jańalıqlar kirgizildi. Atap aytqanda, birinshi márte sırt mámleketlerde ózbek mádeniyatı hám kórkem ónerin jedel úgit-násiyatlap atırǵan ǴMDA mámleketleriniń wákilleri ushın «Jıldıń eń jaqsı sırt eldegi ózbek mádeniyatı úgit-násiyatlawshısı» nominaciyası engizildi.
Sıylıq iyelerin sıylıqlaw máresimine elimizdiń mádeniyat hám kórkem óner ǵayratkerleri menen birge sırt elli miymanlar da qatnastı. Atap aytqanda, Tájikstanda xızmet kórsetken artist, Ózbekstan xalıq artisti Nigina Amanqulova, Ázerbayjan xalıq artisti Mensum Ibragimov hám Ózbekstan hám Ázerbayjan xalıq artisti Gulyanaq Memedova, Bashqurtstannıń «Ay Yola» toparı miyman sıpatında qatnastı.
Házirge shekem sıylıq sheńberinde 20 nominaciya boyınsha 60 dóretiwshi múnásip dep tabılıp, xoshametlengen edi. Bıyılǵı sıylıqlaw máresiminde Milliytanlov.uz platforması arqalı ashıq dawıs beriw procesi boyınsha 20 jeńimpaz kóplegen nominaciyalar boyınsha anıqlandı.
Bul sıylıq penen mádeniyat hám kórkem óner tarawında 2025-jıl dawamında joqarı nátiyjelerge erisken, respublikalıq hám xalıqaralıq ilajlarda belsene qatnasqan tarawdıń múnásip wákilleri 20 nominaciya – «Jıldıń eń jaqsı erkek maqam qosıqshısı», «Jıldıń eń jaqsı hayal maqam qosıqshısı», «Jıldıń eń jaqsı opera atqarıwshısı», «Jıldıń eń jaqsı spektakli», «Jıldıń eń jaqsı teatr aktyorı», «Jıldıń eń jaqsı teatr aktrisası», «Jıldıń eń jaqsı teatr rejissyorı», «Jıldıń eń jaqsı dramaturgi», «Jıldıń eń jaqsı kórkem filmi», «Jıldıń eń jaqsı cirk artisti», «Jıldıń eń jaqsı askiyashısı», «Jıldıń eń jaqsı qızıqshısı», «Jıldıń eń jaqsı reńli súwret ustası», «Jıldıń eń jaqsı jas baqsısı», «Jıldıń eń jaqsı folklor jámááti», «Jıldıń eń jaqsı ayaq oyınshısı», «Jıldıń eń jaqsı estrada qosıqshısı», «Jıldıń eń jaqsı erkek estrada qosıqshısı», «Jıldıń eń jaqsı sırt eldegi ózbek mádeniyatın úgit-násiyatlawshısı», «Jıldıń eń jaqsı mádeniyat orayı» sıyaqlı nominaciyalar boyınsha sıylıqlandı.
Milliy sıylıqqa jańadan qosılǵan «Jıldıń eń jaqsı sırt eldegi ózbek mádeniyatın úgit-násiyatlawshısı» nominaciyasına birinshi talabanlar yaponiyalı Mashu Komazaki, qazaqstanlı Arman Nurmaxamatuli hám ázerbayjanlı Sahib Pashshazade boldı.
Jeńimpaz dóretiwshiler tańlawdıń arnawlı statuetkası hám sertifikatı, bazalıq esaplaw muǵdarınıń 100 esesi muǵdarında aqshalay sıylıq penen sıylıqlandı.
Saltanatlı sıylıqlaw máresimi “Zo`r TV” telekanalı arqalı janlı efirde kórsetildi.
Ózbekstan Respublikası Prezidentiniń 2023-jıl 25-dekabrdegi «Xalıqqa mádeniy xızmet kórsetiw dárejesin bunnan bılay da arttırıw ilajları haqqında»ǵı qararı hám Ózbekstan Respublikası Ministrler Kabinetiniń 2022-jıl 14-oktyabrdegi «Jańa Ózbekstan juldızları» mádeniyat hám kórkem óner milliy sıylıǵı haqqındaǵı rejeni tastıyıqlaw haqqında»ǵı qararınıń orınlanıwın támiyinlew maqsetinde «Jańa Ózbekstan juldızları» mádeniyat hám kórkem óner milliy sıylıǵınıń jeńimpazların anıqlawǵa baylanıslı saltanatlı ilaj turaqlı ótkerilip kiyatırǵanın aytıp ótiw kerek.

Nazokat USMONOVA,
ÓzAnıń xabarshısı