Ámiwdárya rayonındaǵı Mádeniyat orayında rayon hákimligi, Ózbekstan Respublikası Ministrler Kabineti janındaǵı Migraciya agentligi hám Jeke bántlik agentlikleri federaciyası menen birgelikte jumıssız hám bánt bolmaǵan puqaralardıń bátligine járdemlesiw, olardı xalıqaralıq miynet bazarındaǵı kásiplerge baǵdarlaw maqsetinde «Sırt elde jumıs» bos jumıs orınları miynet yarmarkası bolıp ótti.
Onda elimizde jumıs alıp barıp atırǵan Workmall, Getwork, Worldbridge, Horizon Work, Bestwill, International Migration Line, Jobbridge, Mirpower, Interwork va The Best Staff sıyaqlı onnan aslam jeke menshik bántlik agentlikleri Germaniya, Polsha, Qubla Koreya, Túrkiya, Yaponiya hám basqa da mámleketlerdegi qurılıs, óndiris, xızmet kórsetiw, medicina sanaat, awıl xojalıǵı hám basqa da tarawlardaǵı joqarı dáramatlı jumıs orınları usınıs etti.
– Elimizde xalıqtıń bántligin támiyinlew, puqaralar ushın múnásip jumıs orınların jaratıw, sonıń ishinde, miynet migraciyasın tártipke salıw mámleketlik siyasattıń tiykarǵı baǵdarlarınan biri sıpatında belgilep alınǵan, – deydi Migraciya agentligi Qaraqalpaqstan Respublikası filialı baslıǵı A.Achilov. – Búgin shólkemlestirilgen miynet yarmarkası rayon xalqı, ásirese, sırt elde jumıs islew niyetinde bolǵan watanlaslarımız ushın jańa imkaniyatlar esigin ashtı. Bul yarmarkalar puqaralarǵa nızamlı, qáwipsiz hám kepillengen miynet jumısın jolǵa qoyıwda áhmiyetli rol atqaradı. Itibarlı tárepi sonda, usınıs etilip atırǵan barlıq jumıs orınları rásmiy miynet shártnamaları, nızamlı vizalar hám ruxsatnamalar, sociallıq qorǵaw hám miynet huqıqlarınıń kepillikleri tiykarında ámelge asırıladı. Bul bolsa puqaralarımızdıń qáwipsiz hám turaqlı miynet etiwin támiyinlewde úlken áhmiyetke iye.
Yarmarkada 500 den aslam puqara qatnasıp, olarǵa jeke menshik bántlik agentlikleriniń qánigeleri tárepinen sırt elde jumıs islew shártleri, miynet shártnamaları, viza hám ruxsatnamalar, miynet haqı, sociallıq kepillikler jáne qáwipsizlik máseleleri boyınsha anıq hám isenimli maǵlıwmatlar usınıldı.
Jeke menshik bántlik agentlikleri tárepinen berilgen jumıs orınlarına 337 puqara qızıǵıwshılıq bildirip, dizimnen ótti. Sonday-aq, qatnasıwshılarǵa sırt elde jumıs islewde nızamshılıq, qáwipsizlik, huqıqıy hám finanslıq qollap-quwatlaw máseleleri boyınsha tolıq túsinikler berildi.

Qaraqalpaqstan xabar agentligi