Prezident Shavkat Mirziyoevtiń basshılıǵında videoselektor májilisi dawam etpekte.
Ishki isler hám Milliy gvardiya xızmetkerlerine túngi xızmettiń hár bir saatına bazalıq esaplawdıń 5 procenti muǵdarında kompensaciya tóleniwi belgilendi.
Xalıqtıń huqıqların támiyinlew hám qolaylı sharayat jaratıw maqsetinde sudlar, advokatura, sud-medicinalıq ekspertizanıń da oraylasqan túngi náwbetshiligin shólkemlestiriw boyınsha sırt el tájiriybesin úyreniw tapsırıldı.
Aldınǵı tájiriybe tiykarında xalıq tıǵız jaylasqan orınlarda dron járdeminde patrullıq baqlaw jolǵa qoyıladı.
CHilanzar rayonı ishki isler xızmetkerleri tarawı hám aymaǵına qaramastan, puqara múrájatın qabıl etedi, kóshede formalı xızmetkerge etilgen múrájat “102”ge xabar bergen menen teń boladı.
Rayondaǵı barlıq 55 máhálledegi profilaktika inspektorınıń xızmet bólmesi esigi onıń menen operativ baylanısıw ushın baylanıs túymesi menen úskenelenedi. Yaǵnıy profilaktika inspektorı qay jerde bolmasın, xalıq onıń qol telefonı hám planshetine kúni-túni baylanısıwı múmkin boladı.
Profilaktika inspektorı ushın zamanagóy, xalıqqa unaytuǵın kóriniste formanı tayarlaw tapsırıldı. Inspektorlardıń jumısı sanlastırıladı, “dawıslı túsinik xat” alıw ámeliyatı jolǵa qoyıladı.
Sonday-aq, rayonlıq ishki isler tergew bóliminde materiallardı kórip shıǵatuǵın tergewge shekem tekseriw toparları dúziledi.
Bunnan bılay profilaktika inspektorına KPI qoyıwda protokol dúziw ólshem bolmaydı.
“Huqıqbuzarlıqlar profilaktikası haqqında”ǵı nızam da oǵada deklaraciyalıq jazılǵanı, haqıyqıy jaǵday tiykarında ámelde isleytuǵın jańa nızam joybarın islep shıǵıw, Hákimshilik juwapkershilik haqqındaǵı kodeksti de profilaktikaǵa baǵdarlanǵan hám tásirsheńligin arttırǵan halda jańalaw áhmiyetli ekenligi atap ótildi.

ÓzA