Ózbekstan Respublikası Qurallı Kúshleri Joqarı bas sárkardası Shavkat Mirziyoevtiń basshılıǵında usı jıldıń 13-yanvar kúni Qáwipsizlik keńesiniń mámleketimiz áskeriy qáwipsizligi hám qorǵanıw potencialın bunnan bılay da bekkemlew máselelerine baǵıshlanǵan keńeytilgen májilisi bolıp ótti. Bul májiliste mámlekettiń qorǵanıw siyasatın jańa basqıshqa alıp shıǵıw, Qurallı Kúshlerdiń jumısın zaman talabına sáykes túp-tiykarınan jetilistiriwge qaratılǵan tiykarǵı wazıypalar belgilep berildi.
Májilis dawamında mámleketimiz basshısı tárepinen áskeriy tarawda basqarıw nátiyjeliligin arttırıw, zamanagóy qáwip-qáterlerge múnásip juwap bere alatuǵın professional armiyanı qáliplestiriw, sonday-aq, múddetli áskeriy xızmetti jaslardı tárbiyalaw hám olardı turmısqa tárbiyalawdıń áhmiyetli institutı sıpatında rawajlandırıw máselelerine ayrıqsha itibar qaratıldı.
Atap ótilgenindey, áskeriy xızmet intizam, juwapkershilik hám watansúyiwshilik sezimlerin qáliplestiriw menen bir qatarda jaslar ushın bekkem kásiplik tiykar jaratıwı lazım.
Bul wazıypalardıń orınlanıwın sistemalı hám mánzilli shólkemlestiriw maqsetinde Respublikalıq jumısshı topar dúzildi. Bul topar quramına tiyisli ministrlikler hám uyımlar, joqarı hám orta arnawlı bilimlendiriw mákemeleri, sonday-aq, taraw qánigeleri tartılǵan bolıp, olar áskeriy xızmet dawamında jaslardı zamanagóy kásiplerge oqıtıw, olardıń mamanlıǵın sertifikatlaw jáne xızmet juwmaǵınan soń bántligin kepillewge qaratılǵan mexanizmlerdi islep shıqpaqta.
Házirgi kúnde Respublikalıq jumısshı topar Qaraqalpaqstan Respublikası hám Xorezm wálayatında ámeliy jumısın baslaǵan. Aymaqlarda alıp barılıp atırǵan úyreniwler sheńberinde áskeriy bólimlerdiń materiallıq-texnikalıq bazası, infrastruktura imkaniyatları, shaqırılıwshılar hám jaslardıń qızıǵıwshılıqları, sonday-aq, aymaqlıq miynet bazarınıń real talapları hár tárepleme tallanbaqta. Usı tallawlar tiykarında áskeriy xızmet procesinde úyretiletuǵın kásiplerdiń anıq baǵdarları belgilep alınbaqta.
Áhmiyetlisi sonda, bul baslamalar tek ǵana qısqa múddetli nátiyjeler emes, al mámlekettiń uzaq múddetli áskeriy, ekonomikalıq hám sociallıq qáwipsizligin támiyinlewge xızmet etedi. Kásip iyelegen, turmısqa tayar, erkin pikirleytuǵın, tártipli hám watansúygish jaslar – Qurallı úshlikler qúdiretin bekkemlew menen birge, jámiyet turaqlılıǵı hám rawajlanıwınıń áhmiyetli tayanıshına aylanadı.

Qaraqalpaqstan xabar agentligi.