Ózbekstan Respublikası Prezidenti Shavkat Mirziyoev AQSh Prezidenti Donald Tramptıń mirát etiwine bola 21-22-yanvar kúni Amerika jetekshisiniń baslaması menen shólkemlestirilgen Tınıshlıq keńesiniń rejesine qol qoyıw máresiminde qatnasıw ushın ámeliy sapar menen Shveycariyaǵa bardı.
Mámleketimiz basshısı 22-yanvar kúni Davos qalasında Tınıshlıq keńesiniń Rejesine qol qoyıw máresiminde qatnastı.
AQSh Prezidenti Donald Tramptıń basshılıǵında ótken ilajda Argentina, Armeniya, Baxreyn, Bolgariya, Indoneziya, Iordaniya, Morokko, Mongoliya, Ázerbayjan, Paragvay, Pakistan, Qatar, Qazaqstan, Saudiya Arabstanı, Túrkiya, Vengriya hám basqa da mámleketlerdiń basshıları, bas ministrleri hám sırtqı isler ministrleri de qatnastı.
Tınıshlıq keńesiniń shólkemlestiriliwi Ózbekstan sırtqı siyasatınıń tınıshlıqtı támiyinlew baǵdarındaǵı baslamaları hám kóp qırlı birge islesiwdi qollap-quwatlawǵa qaratılǵan tiykarǵı wazıypalarına sáykes bolıp esaplanadı. Jańa struktura BMShtıń Qáwipsizlik Keńesi rezolyuciyası menen qollap-quwatlanǵan Gaza sektorındaǵı kelispewshilikti saplastırıw boyınsha kompleksli rejeni ámelge asırıw sheńberinde qáliplestirilmekte.
Tınıshlıq keńesi kelispewshiliktiń keskinlesiw qáwpin azaytıw, Gaza sektorında ekonomikalıq hám sociallıq tikleniw ushın qolaylı sharayatlar jaratıwǵa qaratılǵan. Bul abadan ekonomika hám tınısh-tatıw turmısqa iye Jańa Gazanı qurıw, keleshekte Palestina mámleketin dúziw imkaniyatın jaratpaqta.
Keńes quramınan dúnyanıń túrli mámleketlerinen abıraylı hám tásirli jetekshiler orın aldı.
Keńes Rejesine qol qoyıp, Ózbekstan onı shólkemlestirgen mámleketlerden birine aylandı. Bul mámleketimizdiń keńes jumısında izbe-iz qatnasıwǵa hám barlıq shólkemlestiriwshi mámleketler hám xalıqaralıq sherikler menen tıǵız birge islesiwde onıń wákilliklerin turmısqa engiziwde ámeliy úles qosıwǵa tayar ekenin ańlatadı.
Tınıshlıq keńesiniń Rejesine qol qoyıw máresimi sheńberinde Ózbekstan Respublikası Prezidenti Shavkat Mirziyoev, Ázerbayjan Respublikası Prezidenti Ilham Aliev hám Vengriya Bas ministri Viktor Orban arasında sóylesiw bolıp ótti.
Jetekshiler doslıq ruwxında óz-ara paydalı birge islesiwdi keńeytiw máselelerin dodaladı.
Kóp tárepleme, sonıń ishinde, Túrkiy mámleketler shólkemi sheńberindegi birge islesiw perspektivalarına ayrıqsha itibar qaratıldı.
Bunnan soń Ózbekstan Prezidenti “Blackrock” kompaniyası direktorlar keńesiniń aǵzası hám úlken basqarıwshı direktorı Adebayo Ogunlesi menen ushırastı.
Bul jetekshi kompaniya menen investiciyalıq birge islesiwdiń tiykarǵı baǵdarları hám burın erisilgen kelisimlerdi ámelge asırıw máseleleri dodalandı.
“Blackrock” kompaniyasınıń mámleketimizdegi tiykarǵı joybarlarda qatnasıw perspektivaları boyınsha pikir alısıldı.
Kompaniyanıń Ózbekstandaǵı bir qatar kárxanalardıń kapitalına kiriw, birgeliktegi investiciya mexanizmlerin islep shıǵıw hám mámlekettiń investiciyalıq ortalıǵın jaqsılaw ushın xalıqaralıq ekspertizanı tartıw boyınsha baslamaları qollap-quwatlandı.
Davostaǵı ilajlar sheńberinde Ózbekstan Respublikası Prezidenti Shavkat Mirziyoev Evropa tikleniw hám rawajlanıw bankiniń prezidenti Odil Reno-Basso menen ushırasıw ótkerdi.
Bul jetekshi finans institutı menen strategiyalıq sheriklikti jáne de tereńlestiriw hám birge islesiwdi keńeytiwdiń ámeliy tárepleri dodalandı.
Banktiń mámleketimiz benen birge islesiwi turaqlı strategiyalıq xarakterge iye. Ózbekstan ETRBnıń regiondaǵı eń iri sherigi bolıp qalmaqta. Banktiń investiciyalarınıń kólemi derlik 7 milliard dollarǵa jetti.
2025-jılı ámeliyatlar, sonıń ishinde, jeke menshik sektorǵa baǵdarlanǵan qarjılardıń kólemi 1 milliard dollardan astı.
ETRBnıń “jasıl” energetikanı rawajlandırıw, transport infrastrukturasın modernizaciyalaw, ekologiyalıq baǵdarlamalardı ámelge asırıw, finans bazarın reformalaw hám isbilermenlikti rawajlandırıwǵa qosıp atırǵan úlesi joqarı bahalandı.
Usı jıl ushın birge islesiwdiń tiykarǵı baǵdarları, sonıń ishinde, jeke menshik sektor hám infrastrukturanı rawajlandırıw, temir jol transportın sanlı transformaciyalaw hám basqa da máseleler belgilep alındı.
Hayal-qızlar hám jaslardı zamanagóy kásipler hám bizneske oqıtıw boyınsha baǵdarlamalardı dawam ettiriwge ayrıqsha itibar qaratıldı.
Davostaǵı ilajlar sheńberinde Prezident Shavkat Mirziyoev Qazaqstan Prezidenti Qasım-Jomart Toqaev, Serbiya Prezidenti Aleksandr Vuchich, AQSh sawda ministri Govard Latnik, Ullı Britaniyanıń burınǵı Bas ministri, Global ózgerisler institutınıń baslıǵı Toni Bler menen de sóylesiwler ótkerdi.
Sonıń menen Ózbekstan Respublikası Prezidenti Shavkat Mirziyoevtiń Shveycariyaǵa ámeliy saparı juwmaqlandı.

ÓzA