Ózbekstan Respublikası Prezidentisi Shavkat Mirziyoevtıń Oliy Majliske hám kóp milletli xalqımızǵa Múrájatında 2026-jıldıń “Máhálleni rawajlandırıw hám jámiyetti ilgeriletiw jılı” dep járiyalanıwı mámleketimizde máhálle institutınıń ornı hám abırayın jáne de bekkemlewge qaratılǵan reformalardıń logikalıq dawamı boldı.

Bul baslama Qaraqalpaqstan Respublikasında da máhálle sistemasın zaman talaplarına sáykes halda rawajlandırıw ushın keń imkaniyatlar jaratadı.
Máhálle xalqımız turmısında ázelden sociallıq turaqlılıq, awızbirshilik hám ruwxıy qádiriyatlardı bekkemlewshi áhmiyetli institut sıpatında qáliplesken. Búgingi kúni bolsa ol xalıqtıń mashqalaların tikkeley ornında anıqlap, onı sheshe alatuǵın, mámleket penen puqaralar arasında nátiyjeli qarım-qatnastı támiyinleytuǵın basqarıw sistemasına aylandı.
Sońǵı jılları Qaraqalpaqstan Respublikasında máhállelerdiń materiallıq-texnikalıq támiynatın jaqsılaw, infrastrukturasın rawajlandırıw, xalıq ushın qolaylı jasaw ortalıǵın jaratıwǵa qaratılǵan kompleksli ilajlar ámelge asırılmaqta. Aymaqlardıń sociallıq-ekonomikalıq potencialın esapqa alǵan halda, máhállelerde bántlikti támiyinlew, isbilermenlikti qollap-quwatlaw hám kámbaǵallıqtı qısqartıw tiykarǵı baǵdar sıpatında belgilenbekte. Atap aytqanda, házirgi waqıtta Qaraqalpaqstan máhálleleri xalıqtıń bántligin támiyinlewde áhmiyetli institucionallıq mexanizmge aylanbaqta. Máhállelerde jumıssız puqaralardı anıqlaw, olardı kásip-ónerge tayarlaw, shańaraqlıq isbilermenlik, qıytaq jer xojalıǵı, ónermentshilik hám xızmet kórsetiw tarawlarına tartıw arqalı turaqlı dáramat dárekleri jaratılmaqta. Sonıń ishinde, ásirese, jaslar hám hayal-qızlardıń ekonomikalıq belsendiligin arttırıw, mútáj shańaraqlarǵa mánzilli sociallıq járdem kórsetiw máselelerine ayrıqsha itibar qaratılmaqta.
“Máhállelerdi rawajlandırıw hám jámiyetti ilgeriletiw jılı” sheńberinde ámelge asırılatuǵın ilajlar anıq maqset hám nátiyjelerge qaratılǵanı menen áhmiyetli. Hár bir máhálleniń abadanlıǵı, xalıqtıń turmıs dárejesi, bántlik jaǵdayı, jaslardıń bilimi hám intakerligi, sociallıq ortalıqtıń salamatlıǵı usı siyasattıń nátiyjeliliginiń tiykarǵı ólshemleri bolıp esaplanadı.
Juwmaqlap aytqanda, Qaraqalpaqstan Respublikasında máhálle sistemasın rawajlandırıw, xalıqtıń bántligin támiyinlew hám kámbaǵallıqtı qısqartıwǵa qaratılǵan sistemalı reformalar jámiyettiń turaqlılıǵın támiyinlewge hám Jańa Ózbekstannıń rawajlanıwınıń bekkem tiykarın jaratıwǵa xızmet etedi.

Saǵındıq Turmanov,
Ózbekstan máhálleleri assosaciyası Qaraqalpaqstan Respublikası basqarmasınıń baslıǵı.
Qaraqalpaqstan xabar agentligi