Qaraqalpaqstan Respublikası Ministrler Keńesiniń Baslıǵı F.Ermanov Qıtaydıń “Beijing China Sciences Runyu Environmental Technology” (CSET) kompaniyası Keńesi Baslıǵı L.Bo basshılıǵındaǵı delegaciya aǵzaları menen ushırasti.

Ushırasıw dawamında eki tárepleme birge islesiwdi rawajlandırıw, ekologiya hám turaqlı rawajlanıw tarawında qospa joybarlardı ámelge asırıw máseleleri dodalandı. Atap aytqanda, Qıtay kompaniyası tárepinen zamanagóy texnologiyalar tiykarında turmıslıq shıǵındılardı qayta islew, olardan alternativ energiya dereklerin alıw boyınsha usınıslar bildirildi.
Ushırasıwda Qaraqalpaqstan Respublikası Ministrler Keńesiniń Baslıǵı F.Ermanov qorshaǵan ortalıqtı qorǵaw, shıǵındılardı basqarıw sistemasın jetilistiriw hám “jasıl ekonomika” principlerin engiziw mámleketlik siyasattıń tiykarǵı baǵdarlarınan biri ekenin atap ótti. Sonday-aq, bul tarawda aldınǵı sırt el tájiriybesin engiziw hám investiciyalardı tartıwǵa úlken itibar qaratılıp atırǵanı atap ótildi.
Ushırasıw juwmaǵında tárepler óz-ara paydalı birge islesiwdi jolǵa qoyıw, investiciyalıq joybarlardı islep shıǵıw hám keleshekte ámeliy birge islesiwdi keńeytiw boyınsha kelisimge eristi.

Qaraqalpaqstan xabar agentligi