Ájiniyaz atındaǵı Nókis mámleketlik pedagogikalıq institutı Tábiyǵıy pánler fakultetinde «Jasıl ekonomika hám ekologiyalıq bilimlendiriw: ilimiy-pedagogikalıq qatnaslar» atamasındaǵı respublikalıq ilimiy-ámeliy konferenciyası bolıp ótti.

Konferenciya jasıl ekonomika principlerin bilimlendiriw sistemasına engiziw, ekologiyalıq mádeniyattı qáliplestiriw hám turaqlı rawajlanıw maqsetlerine erisiwde ilimiy-pedagogikalıq qatnaslardıń ornın jáne áhmiyetin dodalawǵa arnaldı.
Ilajǵa respublikamızdaǵı joqarı oqıw orınları hám ilimiy-izertlew institutları, mámleketlik hám jámiyetlik shólkemlerdiń wákilleri, professor-oqıtıwshılar, ilimpazlar, doktorantlar hám studentler qatnastı.
Konferenciya dawamında jasıl ekonomikanıń zamanagóy baǵdarları, ekologiyalıq bilimlendiriwdi rawajlandırıw, qorshaǵan ortalıqtı qorǵaw, resurslardan aqılǵa uǵras paydalanıw, bilimlendiriw procesinde ekologiyalıq bilim hám kónlikpelerdi qáliplestiriwge qaratılǵan aldınǵı tájiriybeler boyınsha bayanatlar tıńlandı. Sonday-aq, ekologiyalıq turaqlılıqtı támiyinlewde innovaciyalıq bilimlendiriw texnologiyaları hám pánler aralıq qatnaslardıń áhmiyeti ayrıqsha atap ótildi.
Qatnasıwshılar tárepinen bildirilgen pikir hám usınıslar tiykarında ekologiyalıq bilimlendiriwdiń sapasın arttırıw, jasıl ekonomika ideyaların pedagogikalıq processlerge keńnen engiziw boyınsha áhmiyetli juwmaqlar hám ámeliy usınıslar islep shıǵıldı.
Konferenciya juwmaǵında bilimlendiriw hám ilim tarawında ekologiyalıq juwapkershilikti kúsheytiw, jaslardıń sanasında tábiyatqa juwapkershilikli qatnastı qáliplestiriw hám jasıl ekonomika principlerin úgit-násiyatlaw áhmiyetli wazıypa ekeni atap ótildi.

Qaraqalpaqstan xabar agentligi