Ózbekstan Respublikası Prezidenti Shavkat Mirziyoev Yaponiya Bas ministri Sanae Takaichidiń mirát etiwine bola 18-20-dekabr kúnleri rásmiy sapar menen usı mámlekette boldı.

Mámleketimiz basshısı Shavkat Mirziyoev 20-dekabr kúni Tokioda “Oraylıq Aziya + Yaponiya” sóylesiwiniń birinshi sammitinde qatnastı.
Yaponiya Bas ministri Sanae Takaichi basshılıǵında ótken ilajda Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám Túrkmenstan Prezidenti Serdar Berdimuhamedov ta qatnastı.
Kún tártibine muwapıq, Oraylıq Aziya mámleketleri hám Yaponiya arasında “jasıl” ekonomika hám turaqlı rawajlanıw, óz-ara baylanıslılıq hám regionallıq birge islesiwdi bekkemlew, insan resursların rawajlandırıw sıyaqlı tiykarǵı tarawlarda óz-ara paydalı birge islesiwdi keńeytiw perspektivaları dodalandı.
Mámleketimiz basshısı óziniń shıǵıp sóylegen sózinde bunnan jigirma jıl burın áyne kúnshıǵıs eli birinshi márte “Oraylıq Aziya +” sóylesiwiniń baslamashısı bolǵanın atap ótti. Ullı jipek jolı dáwirinen rawajlana baslaǵan tıǵız sawda hám mádeniy baylanıslar, uqsas dástúr hám úrp-ádetler, ruwxıy, mádeniy hám shańaraqlıq qádiriyatlar Oraylıq Aziya hám Yaponiya arasında kóp tárepleme birge islesiwdi rawajlandırıw ushın bekkem tiykar bolıp esaplanadı.
– Biz Oraylıq Aziya mámleketleri ǵárezsizlikke eriskennen keyingi dáwir dawamında Yaponiya isenimli sherigimiz bolıp kiyatırǵanın, regionnıń sociallıq-ekonomikalıq rawajlanıwı, infrastruktura, sanaat hám energetika bazasın modernizaciyalaw, ilim hám bilimlendiriw jáne kadrlar potencialın bekkemlewge salmaqlı úles qosıp atırǵanın joqarı qádirleymiz. Sol sebepli Oraylıq Aziya mámleketleri Yaponiyanıń region turmısında jáne de keń hám belsene qatnasıwınan mápdar, – dedi Shavkat Mirziyoev.
Region tábiyǵıy resurslarǵa baylıǵı, dúnyadaǵı transport, sawda hám energetika baǵdarları kesilispesinde jaylasqanı, Oraylıq Aziya mámleketleri ekonomikasınıń jedel pátlerde ósip atırǵanı jáne bul jerde bolıp atırǵan jaqınlasıw hám integraciyanıń jedel processleri Yaponiya menen kooperaciya ushın qolaylı sharayat jaratpaqta.
– Birgeliktegi háreketlerimiz benen jańa sheklerge erisetuǵınımızǵa isenemen. Danıshpan yapon xalqınıń aytqanınday, eger kúshler birlesse, tawlardı da ornınan qozǵatıw múmkin, – dedi Ózbekstan jetekshisi.
Prezidentimiz sammit kún tártibine ótip, “Oraylıq Aziya + Yaponiya” formatında birge islesiwdi rawajlandırıw boyınsha óz kózqarasın usındı.
Bárinen burın, sammitlerdi mámleket basshıları dárejesinde hár eki jılda bir márte ótkeriw usınıs etildi. Bul birge islesiwge qosımsha kúshli pát baǵıshlawǵa xızmet etedi. Gezektegi usınday ushırasıwlardan birin Ózbekstanda qabıl etiwge tayar ekenligi bildirildi.
Yaponiyanıń ádillik hám huqıq tarawında birge islesiw boyınsha jańa turaqlı mexanizmin jaratıw hám kelesi jılı Tokioda ádillik ministrleriniń birinshi ushırasıwın shólkemlestiriw baǵdarındaǵı baslaması qollap-quwatlandı.
Mámleketimiz basshısı Ózbekstan “Oraylıq Aziya – Yaponiya 2040” birge islesiw strategiyasın islep shıǵıp, hújjetke region mámleketleriniń turaqlı rawajlanıwına járdemlesiw hám olardı globallıq ekonomikalıq processlerge tereń integraciyalaw boyınsha anıq baǵdarlama hám joybarlardı kirgiziw tárepdarı ekenin atap ótti.
Jańa ideya hám usınıslardı islep shıǵıw, birge islesiwdiń keń kólemli kún tártibin qáliplestiriw ushın mámleketlerimizdiń jetekshi tallaw strukturalarınıń qatnasıwında Ekspertler forumın shólkemlestiriw áhmiyetli ekenligi atap ótildi. Forumnıń birinshi májilisin kelesi jılı Tashkentte ótkeriw usınıs etildi.
Ózbekstan jetekshisi Yaponiya finans institutlarınıń Oraylıq Aziyada sawda-ekonomikalıq hám investiciyalıq joybarlardı qollap-quwatlawdı keńeytiwin qollap-quwatladı.
– Oraylıq Aziyanıń bay tábiyǵıy hám kadrlar resursların Yaponiyanıń sanaat hám texnologiyalıq potencialı menen birlestirip, bir-birimizdi tolıqtırıw hám kúsheytiw boyınsha nátiyjege erise alamız, dep isenemen, – dedi Shavkat Mirziyoev.
Usı múnásibet penen Oraylıq Aziyanıń infrastrukturasın hám sanaatın rawajlandırıw investiciyalıq fondın shólkemlestiriw usınıs etildi. Onıń negizinde “Sapalı infrastruktura” boyınsha baǵdarlama jáne Yaponiya texnoparkleriniń Oraylıq Aziya tarmaǵı – sanaat kooperaciyası, lokalizaciyalaw hám texnologiyalar transferi regionallıq platformasın iske qosıw múmkin.
Búgin sanlı transformaciya ekonomikalıq ósiw hám turaqlılıqtıń sheshiwshi faktorına aylanıp baratırǵanınan kelip shıǵıp, mámleketimiz basshısı “Oraylıq Aziya – Yaponiya” sanlı xabı – sanlı sheshimler, jasalma intellekt, “buyımlar interneti”, kiberqáwipsizlik hám innovaciyalıq ekonomika tarawlarında kóp tárepleme birge islesiw platformasın jaratıw áhmiyetli ekenligin atap ótti.
Tez júrer poezdlar hám avtomobil jolların qurıw, transport koridorların sanlastırıw, aeroportlar hám logistika orayların qurıw joybarlarına Yaponiya investiciyaları, texnologiyaları hám ekspertleriniń járdemin tartıwdan mápdarlıq bildirildi.
“Jasıl” energetika tarawındaǵı birge islesiw sheńberinde kogeneraciya texnologiyaların engiziw, shıǵınlardı qısqartıw, zıyanlı gazlerdi uslap qalıw boyınsha birgeliktegi joybarlardı ámelge asırıw áhmiyetli ekenligi atap ótildi. Tashkentte qayta tiklenetuǵın energetika tarawında qánigelerdi tayarlaw boyınsha regionallıq oraydı shólkemlestiriw usınısı alǵa qoyıldı.
Mámleketimiz basshısı ekologiya tarawında Oraylıq Aziyada hawanıń sapasın jaqsılaw boyınsha birgeliktegi baǵdarlamanı iske qosıw, Klimat ózgeriwine qarsı gúresiw boyınsha birgeliktegi háreketler baǵdarlamasın qabıl etiw hám Qarım-qatnas sheńberinde qorshaǵan ortalıqtı qorǵaw uyımları basshılarınıń jańa túrdegi ushırasıwların shólkemlestiriw áhmiyetli ekenligin atap ótti.
Yaponiyanıń seysmikalıq qáwipsizlik tarawındaǵı úlken tájiriybesin esapqa alıp, regionda seysmikalıq turaqlılıqtı bahalaw hám arttırıw boyınsha birgeliktegi baǵdarlamanı iske qosıw, Tashkent qalasında Yaponiya standartları hám protokolları boyınsha injenerler, arxitektorlar, qutqarıw xızmetlerin tayarlaw ushın Regionallıq mamanlıq arttırıw orayın ashıw usınıs etildi.
Mádeniy-gumanitarlıq tarawdaǵı birge islesiwdi jáne de keńeytiw maqsetinde Ózbekstanda kelesi jılı “Oraylıq Aziya + Yaponiya” formatında bilimlendiriw ministrleriniń birinshi májilisin, sonday-aq, regiondaǵı jetekshi universitetler rektorlarınıń birinshi forumın ótkeriw, jaslar jámiyetshilikleri arasında uzaq múddetli baylanıslardı qáliplestiriwge qaratılǵan Jaslardı rawajlandırıw regionallıq tarmaqlıq baǵdarlamasın qabıl etiw boyınsha rejeler usınıs etildi.
Ózbekstan jetekshisi xalıqaralıq siyasat hám regionallıq qáwipsizlik máselelerine toqtap, region mámleketleri hám Yaponiyanıń Awǵanstandı tınısh, turaqlı hám dóretiwshilik rawajlanıwǵa qaray baratırǵan mámleket sıpatında kóriw baǵdarındaǵı umtılısları birdey ekenin atap ótti.
Awǵan xalqın qollap-quwatlaw boyınsha kóp jıllardan berli jetekshi donor hám sherik mámleketler qatarında bolıp kiyatırǵan Yaponiyanıń izbe-iz poziciyası joqarı bahalandı.
Ózbekstan Prezidenti sóziniń juwmaǵında kún tártibindegi barlıq máseleler boyınsha qararlardı qollap-quwatlaytuǵının bildirdi.
Sammitte basqa jetekshiler de shıǵıp sóyledi. Ilaj juwmaǵında Tokio deklaraciyası qabıl etildi.
“Oraylıq Aziya + Yaponiya” qarım-qatnası sammiti sheńberinde Ózbekstan Respublikası Prezidenti Shavkat Mirziyoev kóp tárepleme biznes forumında qatnastı.
Ilajda Yaponiya Bas ministri Sanae Takaichi, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám Túrkmenstan Prezidenti Serdar Berdimuhamedov ta qatnastı.
Oraylıq Aziya hám Yaponiya arasındaǵı sawda-ekonomikalıq birge islesiwdi rawajlandırıw, regionǵa Yaponiya investiciyaları hám aldınǵı texnologiyaların tartıw, sanaat kooperaciyasın keńeytiw, isbilermen toparlar arasındaǵı tikkeley baylanıslardı bekkemlewdiń áhmiyetli máseleleri kórip shıǵıldı.
Birgeliktegi ekonomikalıq joybarlar tanıstırıldı. “Sumitomo”, “Chubu Electric Power”, “Shikoku Electric Power” kompaniyaları tárepinen JBIC hám NEXI járdeminde Ózbekstanda eki quyash elektr stanciyasın qurıw, “Toyota Tsusho” qatnasıwında IT infrastrukturasın modernizaciyalaw, “Sojitz” kompaniyası tárepinen kóp tarmaqlı medicina orayın shólkemlestiriw, sonday-aq, “JOGMEC” qatnasıwında jańa oǵada áhmiyetli mineral kánlerin ózlestiriw sıyaqlı Ózbekstan – Yaponiya investiciyalıq baslamaları usılardıń qatarına kiredi.
Jetekshiler janında tiyisli joybarlar boyınsha hújjetler almasıldı.
Ózbekstan Respublikası Prezidenti Shavkat Mirziyoev Yaponiyaǵa rásmiy saparı sheńberinde Nara qalasınıń meri Gen Nakagavanı qabılladı.
Mádeniy-gumanitarlıq birge islesiwdi bekkemlewge ayrıqsha itibar qaratqan halda aymaqlararalıq baylanıslardı bunnan bılay da rawajlandırıw máseleleri dodalandı.
Ótmishi uzaq baylanıslarǵa iye bolǵan Samarqand hám Nara qalaları arasında doslıq qatnasıqları ornatılǵanı joqarı bahalandı. Samarqand kóp ásirler dawamında Ullı jipek jolınıń orayı, Yaponiyanıń áyyemgi paytaxtı Nara bolsa onıń shıǵıs dárwazası bolǵanı atap ótildi. Bul qalalar civilizaciyalar arasındaǵı mádeniy kópir wazıypasın atqarıp, xalıqaralıq sawda hám bilim almasıwın rawajlandırıwda áhmiyetli rol atqarǵan.
2027-jılı Nara milliy muzeyinde kórsetiletuǵın Ózbekstan mádeniyatı hám tariyxına baǵıshlanǵan arxeologiyalıq kórgizbege puqta tayarlıq kóriw áhmiyetli ekenligi atap ótildi. Bul joybar Ózbekstan – Yaponiya diplomatiyalıq qatnasıqları ornatılǵanınıń 35 jıllıǵı húrmetine ótkeriletuǵın iri mádeniy ilaj boladı.
Gen Nakagava eki mámleket hám xalıqlar arasındaǵı máńgi doslıq jáne mádeniy hám tariyxıy jaqınlıqtıń belgisi sıpatında Nara qalasındaǵı jańa baǵlardan birine Samarqand atın beriwge qarar etilgenin járiyaladı.
Sóylesiw dawamında eki dos qala arasındaǵı sawda-ekonomikalıq hám investiciyalıq baylanıslardı jedel rawajlandırıw jáne awıl xojalıǵı, turizm, toqımashılıq, transport, logistika hám qala qurılısı sıyaqlı tarawlarda kooperaciya joybarların ámelge asırıw zárúr ekenligi atap ótildi.
Ózbekstan Respublikası Prezidenti Shavkat Mirziyoev Tokioǵa rásmiy saparı sheńberinde Yaponiya bilimlendiriw, mádeniyat, sport, ilim hám texnologiyalar ministri Macumoto Yoxey, Yaponiya ilimdi rawajlandırıw jámiyetiniń prezidenti Sugino Suyosi jáne Yaponiyanıń Cukuba, Nagoya, Tottori universitetleri, Tokio awıl xojalıǵı hám texnologiyalar universiteti, Nagoya ekonomika universiteti sıyaqlı jetekshi joqarı bilimlendiriw mákemeleriniń basshıları menen ushırastı.
Mámleketimiz basshısı Yaponiya “ekonomikalıq ájayıbatı”nıń tiykarın quraytuǵın bilimlendiriw, ilim hám insan kapitalın rawajlandırıwǵa investiciyalar Ózbekstan – Yaponiya birge islesiwiniń strategiyalıq baǵdarlarınan biri ekenin atap ótti.
Ózbekstan Prezidenti Yaponiya uzaq jıllar dawamında ilimge jumsalǵan qárejetler hám ilimiy patentler sanı boyınsha jetekshiler qatarında turatuǵının atap ótti. Mámleket kóplegen belgili ilimpazlardı, atap aytqanda, fizika, ximiya hám medicina tarawlarında Nobel sıylıǵınıń laureatların jetistirip berdi.
Yaponiya mektep bilimlendiriwi modeli tábiyǵıy pánler hám matematika boyınsha kúshli tayanısh bazasınıń bar ekenligi, sabaq ótiwdiń joqarı sapası, miynet súygishlik, jámáátte islesiw hám tártip-intizam mádeniyatı menen ajıralıp turadı. Abıraylı yapon diplomları, ásirese, injenerlik, robototexnika, medicina hám farmacevtika tarawlarında pútkil dúnyada joqarı bahalanadı. Yaponiyada bilimlendiriw hám ilim menen sanaat hám biznes arasında tıǵız hám bekkem baylanıslar ornatılǵanı ayrıqsha itibarǵa ılayıq.
Búgingi kúnde 2,8 mıńnan aslam ózbekstanlı student Yaponiyanıń jetekshi bilimlendiriw mákemelerinde bilim almaqta. Tek ǵana JDS stipendiya baǵdarlaması boyınsha 440 tan aslam mámleketlik xızmetkerler Yaponiyada oqıtıldı.
Rektorlar forumı óz-ara baylanıslar ushın nátiyjeli maydanǵa aylandı. Oktyabr ayında Samarqandta eki mámlekettiń 50 ge shamalas universitetiniń rektorları qatnasqan besinshi forum tabıslı ótkerildi.
Mámleketimiz basshısı Ózbekstanda bilimlendiriw hám ilimniń rawajlanıwına mámleketti jedel modernizaciyalaw, onıń básekige shıdamlılıǵın jáne global intellektuallıq hám texnologiyalıq mákanǵa integraciyalasıwın támiyinlewdiń tiykarı sıpatında qaralatuǵının atap ótti. Keyingi 7-8 jıl ishinde bul tarawda salmaqlı jumıslar ámelge asırıldı. Biraq, sheshiliwi kerek bolǵan wazıypalar da kóp.
Ilimdi sistemalı transformaciyalaw sheńberinde jańa áwlad izertlewshilerin qáliplestiriw, taraw jumısın klaster modeli tiykarında shólkemlestiriw, áhmiyetli ilimiy baǵdarlar boyınsha resurslardı jámlew sıyaqlı tiykarǵı baǵdarlar belgilengen.
Búgingi ushırasıwda qatnasqan Yaponiya universitetleri mámleketimiz ushın eń áhmiyetli bolǵan jasalma intellekt hám sanlı texnologiyalar, awıl hám suw xojalıǵı, “jasıl” energetika hám turaqlı rawajlanıw, seysmologiya hám “aqıllı qala” texnologiyaları sıyaqlı tarawlar boyınsha bekkem ilimiy-izertlew infrastrukturasına hám joqarı ilimiy-pedagogikalıq potencialǵa iye ekeni atap ótildi.
Bul baǵdarlar boyınsha Ózbekstan universitetleri menen tıǵız birge islesiw baslanǵan. Kúni keshe qospa joybarlardı ámelge asırıwǵa baylanıslı qızǵın sóylesiwler bolıp ótti hám jańa kelisimlerge erisildi.
Birge islesiwdi jáne de rawajlandırıw ushın bilimlendiriw hám ilim boyınsha birgeliktegi komissiya, innovaciyalar boyınsha konsorcium shólkemlestiriw, flagman joybarlar, sonıń ishinde, oqıw procesine JI di engiziw joybarların ámelge asırıw hám injenerlik qánigelikleri boyınsha oqıw baǵdarlamasın iske qosıw usınıs etildi
Ilaj sheńberinde joqarı bilimlendiriw tarawında birge islesiw haqqında húkimetleraralıq kelisim, Cukuba universiteti menen birgelikte Ózbekstanda joqarı bilimlendiriw mákemesin shólkemlestiriw haqqındaǵı memorandum jáne ilimiy birge islesiw hám kadrlar tayarlaw tarawlarında bir qatar basqa da hújjetlerge qol qoyıldı.
Erisilgen kelisimlerdi sistemalı hám óz waqtında ámelge asırıwdı támiyinlew ushın “jol kartası” qabıl etiledi.
Bunnan soń “Kantey” rezidenciyasında Ózbekstan Respublikası Prezidenti Shavkat Mirziyoevti rásmiy kútip alıw máresimi bolıp ótti.
Yaponiya Bas ministri Sanae Takaichi mámleketimiz basshısın qızǵın kútip aldı hám minberge mirát etti.
Eki mámlekettiń mámleketlik gimnleri jańladı. Jetekshiler húrmetli qarawıl qatarı aldınan ótti hám rásmiy delegaciyalardıń aǵzaların qutlıqladı.
Tokioda Ózbekstan Respublikası Prezidenti Shavkat Mirziyoev hám Yaponiya Bas ministri Sanae Takaichidiń sóylesiwleri bolıp ótti.
Mámleketleraralıq birge islesiwdiń derlik barlıq tarawların qamtıp alǵan Ózbekstan – Yaponiya strategiyalıq sheriklik qatnasıqların bunnan bılay da keńeytiw máseleleri hár tárepleme dodalandı.
Yaponiya Bas ministri mámleketimiz basshısın qızǵın qutlıqlap, bul sapar etiwdi hár qashanǵıday joqarı isenim hám óz-ara húrmet principlerine tiykarlanǵan Ózbekstan – Yaponiya qatnasıqları tariyxındaǵı áhmiyetli waqıya dep atadı.
Diplomatiyalıq qatnasıqlar ornatılǵanınan berli ótken 33 jıl dawamında Yaponiya Ózbekstannıń jaqın dostı, tiykarǵı texnologiyalıq hám investiciyalıq sherigi bolıp, respublikada zamanagóy sanaat hám energetika infrastrukturasın jaratıw jáne insan resursların rawajlandırıwǵa salmaqlı úles qosıp kelmekte.
Tovar almasıw, investiciyalar kólemi hám Yaponiya investiciyasınıń qatnasıwındaǵı qospa kárxanalar sanınıń turaqlı ósip atırǵanı qanaatlanıwshılıq penen atap ótildi.
Energetika, geologiya, turizm, infrastrukturanı rawajlandırıw, IT hám basqa da tiykarǵı tarawlarda áhmiyetli joybarlardı ámelge asırıp kiyatırǵan “Sojitz”, “Toyota Tsusho”, “Sumitomo”, “Itochu”, “Kyoto Plaza”, “Balcom”, “Shikoku Electric” sıyaqlı jetekshi yapon kompaniyaları Ózbekstanda tabıslı jumıs alıp barmaqta.
Yaponiya xalıqaralıq birge islesiw agentligi (JICA) hám Yaponiya xalıqaralıq birge islesiw banki (JBIC) menen birgeliktegi joybarlar portfeli energetika, neft-ximiya, transport, bilimlendiriw hám awıl xojalıǵı sıyaqlı tarawlardı qamtıp alǵan.
Sóylesiwlerde parlamentlerdegi “doslıq toparları”, ekonomikalıq birge islesiw komitetleri, tiykarǵı baǵdarlar boyınsha tarmaqlıq ushırasıwlar hám basqa da birge islesiw túrlerin jedellestiriw áhmiyetli ekenligi atap ótildi.
Mámleketimiz basshısı Yaponiya menen strategiyalıq sheriklikti rawajlandırıwdıń bir qatar tiykarǵı baǵdarların atap ótti. “Jasıl” energetika hám sanaatta uglerod shıǵarıwdı azaytıw, málimleme texnologiyaları, oǵada áhmiyetli minerallar, mashina qurılısı tarawındaǵı birge islesiw, densawlıqtı saqlaw hám turizm infrastrukturasın modernizaciyalaw solardıń qatarına kiredi.
Bul sammitke tayarlıq sheńberinde bahası 12 milliard dollardan aslam bolǵan kooperaciyalıq joybarlardıń jańa portfeli qáliplestirilgeni qanaatlanıwshılıq penen atap ótildi. Bul joybarlardı alǵa qoyıw ushın birgeliktegi investiciyalıq platformanı jaratıw usınıs etildi.
Bunnan tısqarı, Samarqand wálayatında Yaponiya modeli hám standartlarına tiykarlanǵan arnawlı ekonomikalıq zonanı qurıw rejeleri járiyalandı.
Yaponiyalı birge islesiwshiler menen birgelikte ámelge asırılıp atırǵan “Bir awıl – bir ónim” baǵdarlamasınıń kólemin keńeytiw usınısı qollap-quwatlandı.
Sonday-aq, óz-ara sawda kólemin kóbeytiw imkaniyatları hám jolları, aymaqlararalıq baylanıslardı keńeytiw máseleleri dodalandı. Kelesi jılı Samarqandta eki mámleket aymaqlarınıń birinshi forumın ótkeriw usınıs etildi.
Gumanitarlıq almasıwlardı jedellestiriwge ayrıqsha itibar qaratılmaqta. Bilimlendiriw hám kadrlar tayarlaw tarawı dástúriy túrde usı kóp qırlı qatnasıqlardıń áhmiyetli bólegi bolıp esaplanadı.
Jaslarǵa keleshekte isbilermenlik joybarların ámelge asırıwı ushın zárúr bolǵan bilim hám kónlikpelerdi iyelewine keń imkaniyatlar berip atırǵan Ózbekstan – Yaponiya Insan resursların rawajlandırıw orayı mámleketimizde tabıslı jumıs alıp barmaqta.
Ózbekstandaǵı 7 joqarı bilimlendiriw mákemesinde yapon tili oqıtılmaqta. Tokio shet tiller universitetinde mine 10 jıldan berli, ózbek tili úyrenilmekte.
Rektorlar forumı kadrlar tayarlaw tarawında tájiriybe almasıw ushın áhmietli maydan bolıp xızmet etpekte. Yaponiyanıń jetekshi joqarı bilimlendiriw mákemeleriniń rektorları menen ushırasıw bolıp ótti. Birge islesiw baǵdarlamaları, ilimiy hám innovaciyalıq almasıwlardı keńeytiw boyınsha áhmiyetli kelisimlerge erisildi.
Cukuba universiteti menen birgelikte Tashkent qalasında birinshi Ózbekstan – Yaponiya universitetin shólkemlestiriw rejelestirilmekte.
Mádeniy hám turistlik baylanıslardı keńeytiw maqsetinde mádeniyat kúnleri, kórgizbeler, jaslar forumları, kinofestivallardı turaqlı ótkerip barıw usınıs etildi. Sapar aldınan Yaponiyada Ózbekstan mádeniyatı kúnleri tabıslı ótkerildi.
Diplomatiyalıq qatnasıqlar ornatılǵanınıń 35 jıllıǵı múnásibeti menen 2027-jılı eki mámlekette Mádeniyat jılları óz-ara ótkeriledi.
Sóylesiwlerde regionallıq hám xalıqaralıq áhmiyetke iye aktual máseleler boyınsha da pikir alısıldı.
Juwmaǵında Ózbekstan Prezidenti hám Yaponiya Bas ministri Keleshek áwladlar ushın keńeytilgen strategiyalıq sheriklik haqqındaǵı birgeliktegi bildiriwge qol qoydı. Bul hújjet, sózsiz, qatnasıqlardı jańa basqıshqa kóteretuǵını hám kóp qırlı birge islesiwdi keńeytiw ushın keń imkaniyatlar ashatuǵını atap ótildi.
Sapar etiw sheńberinde bilimlendiriw, densawlıqtı saqlaw, ekologiya, suw resursları, transport, qala qurılısı, turizm, awıl xojalıǵı, tábiyǵıy apatshılıqlar qáwpin azaytıw tarawlarında salmaqlı kelisimler toplamı qabıl etildi. Bul hújjetlerdi almastırıw máresimi bolıp ótti.
Joqarı dárejedegi sóylesiwler juwmaqlanǵannan soń, “Kantey” rezidenciyasında Ózbekstan Respublikası Prezidenti Shavkat Mirziyoevtiń rásmiy saparı múnásibeti menen Yaponiya Bas ministri Sanae Takaichi atınan qabıllaw máresimi shólkemlestirildi.
Ilajda eki mámleket rásmiy delegaciyalarınıń aǵzaları, isbilermen toparlar hám jámiyetshilik wákilleri de qatnastı.
Mámleketimiz jetekshisi hám Yaponiya húkimetiniń basshısı bolıp ótken sóylesiwlerdiń nátiyjelerinen, olardıń juwmaǵında eki tárepleme baylanıslar keńeytilgen strategiyalıq sheriklik dárejesine kóterilgeninen qanaatlanıwshılıq bildirdi.
Ózbekstan – Yaponiya qatnasıqların bunnan bılay da bekkemlewge umtılıw isenimli ekeni atap ótildi.
Yaponiyadaǵı ilajlar juwmaqlanǵannan soń, Ózbekstan Prezidenti Sankt-Peterburgta bolıp ótetuǵın Evraziya Joqarı ekonomikalıq keńesiniń bolajaq májilisi hám Ǵárezsiz Mámleketlerdiń Doslıq Awqamı jetekshileriniń rásmiy emes sammitinde qatnasıw ushın ámeliy sapar menen Rossiyaǵa jónep ketti.

ÓzA