Jámiyetimizde puqaralar hám isbilermenlerdi qollap-quwatlaw, olardıń ekonomikalıq jaǵdayın jaqsılaw hám biznes joybarların ámelge asırıwǵa járdem beriw tiykarǵı wazıypalardan bolıp esaplanadı. Bankler usı maqsette xalıq hám isbilermenlerge kreditler ajıratpaqta.

Biraq, tilekke qarsı, jaqsı niyet penen alınǵan kredit qarjıların waqtında qaytarmaw, shártnama talaplarına ámel etpew jaǵdayları ushıraspaqta.
Bunday jaǵdaylarda bankler sudqa múrájat etiwge májbúr bolmaqta. Sud qararları tiykarında májbúriy orınlaw uyımları kredit qarızdarlıqların májbúriy óndiriw ilajların qollanadı.
Puqaralıq isleri boyınsha Nókis rayonlar aralıq sudınıń 2025-jıl 4-aprel kúngi qararına bola, qarızdar K.M.dan “Biznesti rawajlandırıw bank” AKB paydasına 308,6 million sum óndiriw, óndiriwdi FENGON S508 EVR markalı elektromobilge qaratıw belgilengen.
Usı sud qararı boyınsha shıǵarılǵan orınlaw hújjeti Májbúriy orınlaw byurosı Qaraqalpaqstan Respublikası Ayrıqsha áhmiyetli orınlaw islerin orınlaw bólimi is júrgiziwine kelip túsip, bólim tárepinen orınlaw háreketlerine kirisilgen.
– Bólim mámleketlik orınlawshısı tárepinen qarızdarǵa usı orınlaw hújjetiniń orınlanıwın támiyinlew ushın 15 kúnlik ıqtıyarlı múddet berilip, sud qararınıń orınlanıwın támiyinlemew aqıbetleri túsindirildi, – deydi MIB Qaraqalpaqstan Respublikası basqarması Ayrıqsha áhmiyetli orınlaw jumısların orınlaw sektorı inspektorı Muhammed Alimov. – Soǵan qaramastan, qarızdar tárepinen orınlaw hújjeti talabı ıqtıyarlı túrde orınlanbaǵanlıǵı sebepli, kreditke alınǵan avtomashina bólim mámleketlik orınlawshısı tárepinen tiyisli tártipte xatlawǵa alınǵan hám elektron onlayn-aukcion sawda maydanshası arqalı satıwǵa shıǵarıp jiberilgen.
Banklerdiń paydasına óndirilip atırǵan qarjılar, óz gezeginde, isbilermenlik jumısın baslamaqshı bolǵan puqaralardıń kreditke bolǵan talabın qanaatlandırıwǵa xızmet etedi.
Kredit qarızdarlıqların óndiriw jumısları dawam etpekte.

Qaraqalpaqstan xabar agentligi