Oraylıq Aziya mámleketleri hám Koreya Respublikası parlamentleri basshılarınıń úshinshi májilisi sheńberinde “Ekonomikalıq birge islesiw, sanlı transformaciya hám sanaat: region mámleketleriniń abadanlıǵı jolları” temasında birinshi sessiya bolıp ótti.

Sessiyada shıǵıp sóylegenler regionallıq ekonomikalıq baylanıslardıń keyingi jıllardaǵı ósiwine itibar qaratıp, eki region arasında ámelge asırılǵan iri birgeliktegi joybarlar, keńeyip atırǵan sheriklik hám bekkemlenip atırǵan óz-ara isenimdi atap ótti.
Sessiya dawamında uzaq múddetli, turaqlı hám strategiyalıq ekonomikalıq birge islesiwge baǵdarlanǵan sistemalı kózqarastı qáliplestiriwge itibar qaratıldı.
Parlament aǵzaları investiciyalardı xoshametlew hám finanslıq birge islesiwdi keńeytiw, regionallıq ekonomikalıq baylanıslılıqtı kúsheytiw mexanizmlerin jetilistiriw, sanlı transformaciyanı birgeliktegi háreketler menen rawajlandırıw jáne parlamentleraralıq birge islesiwdi bekkemlew ushın zárúr nızamshılıq bazasın qáliplestiriw boyınsha usınıslar bildirdi.
Ózbekstan hám Qubla Koreya arasındaǵı strategiyalıq sherikliktiń ámeliy nátiyjeleri, sawda-ekonomikalıq baylanıslardıń turaqlılıǵı, birgeliktegi kárxanalar hám investiciyalıq joybarlardıń rawajlanıwı boyınsha pikir alısıldı.
Qatnasıwshılardıń sessiyadaǵı shıǵıp sóylewlerinde sanlı ekonomika, sanaat, energetika, transport, awıl xojalıǵı hám bilimlendiriw tarawlarında keleshekte birge islesiwdi keńeytiw máselelerine itibar qaratıldı.
Sessiya juwmaǵında ekonomikalıq birge islesiwdi strategiyalıq baǵdar sıpatında rawajlandırıw, birgeliktegi texnologiyalar hám sanaat klasterlerin qáliplestiriw, sonday-aq, sanlı integraciya hám jasıl ekonomika boyınsha joybarlardı jaqın keleshekte ámelge asırıwǵa kelisip alındı.

Qaraqalpaqstan xabar agentligi