Birlesken Arab Ámirlikleriniń Dubay qalasında V Jaslar Paraaziya oyınları bolıp ótip, onda Ózbekstan saylandı komandası 99 altın, 57 gúmis, 41 qola medal menen ulıwma komandalıq esapta Aziya kontinentinde 1-orındı iyelegen edi.

Quwanıshlı tárepi sonda, bul jarısta mámleketimiz saylandı komandası quramında respublikamızdıń jas parasportshıları da qatnasıp, 15 medaldı qolǵa kirgiziwge miyasar boldı. Atap aytqanda, parapauerlifting boyınsha A.Perdebaev hám T.Tursınbaevalar altın, X.Usmanjanov, A.Karimbaev, A.Baltabaeva, T.Uraqbaevalar gúmis, parajeńil atletika sport túriniń yadro hám disk ılaqtırıw túrlerinen M.Sharobiddinova altın, nayza ılaqtırıw boyınsha gúmis, M.Ibragimova altın hám qola medalların, er balalar arasında bellesiwlerde T.Boxaev yadro hám disk ılaqtırıw boyınsha qola medalların jeńip alıwǵa miyasar boldı. Al, parajúziw sport túrinen Sh.Erejepbaeva ekinshi, parataekvondo VT boyınsha O.Amatov úshinshi orınlardı iyelewge eristi.
Álbette, jaslarımızdıń qolǵa kirgizgen bul tabısları, respublikamızda sport tarawın, sonıń ishinde, parasporttı rawajlandırıwǵa qaratılıp atırǵan itibar hám qollap-quwatlawdıń ayqın kórinisi boldı desek boladı. Pursattan paydalanıp, barlıq jeńimpaz parasportshılarımızdı, usınday márt perzentlerimizdi tárbiyalaǵan, iygilikli umtılıslarıńızdı bárqulla qollap-quwatlap kiyatırǵan ata-anaların hám olardıń trenerlerin qolǵa kirgizgen úlken tabısı menen shın kewilden qutlıqlaymız.

Adilbay Orazov,
Qaraqalpaqstan xabar agentligi sholıwshısı.