Ózbekstan Respublikası Prezidenti Shavkat Mirziyoev Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovtıń mirát etiwine bola 11-12-dekabr kúnleri ámeliy sapar menen usı mámlekette boldı.

Mámleketimiz basshısı 12-dekabr kúni Ashxabad qalasındaǵı Biytáreplik monumentine gúl qoyıw máresiminde qatnastı.
Túrkmenstannıń adamgershilik ideyaları, tınıshlıq, dóretiwshilik hám jaqsılıq principlerine sadıqlıǵın sáwlelendiretuǵın Biytáreplik hám “Biytárepliktiń 30 jıllıǵı” esteliklerin óz ishine alǵan kompleks hám oǵan tutas landshaftlı baǵ Túrkmenstan turaqlı biytárepliginiń 30 jıllıǵı jáne “Xalıqaralıq tınıshlıq hám isenim jılı”n belgilewge tayarlıq sheńberinde qayta qurıldı hám saltanatlı túrde ashıldı.
Prezidentimiz basqa da sırt el delegaciyalarınıń basshıları menen birge monumentke gúl qoydı.
Bunnan soń Ózbekstan Respublikası Prezidenti Shavkat Mirziyoev Ashxabad qalasında Túrkmenstan turaqlı biytárepliginiń 30 jıllıǵı, Xalıqaralıq biytáreplik kúni jáne 2025-jıl “Xalıqaralıq tınıshlıq hám isenim jılı” dep járiyalanǵanına baǵıshlanǵan xalıqaralıq forumda qatnastı.
Túrkmenstan Prezidenti Serdar Berdimuhamedovtıń basshılıǵında ótken ilajda Rossiya Federaciyası Prezidenti Vladimir Putin, Túrkiya Respublikası Prezidenti Rejep Tayyip Erdoǵan, Iran Islam Respublikası Prezidenti Masud Pezeshkiyon, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám basqa da mámleketlerdiń jetekshileri, húkimetler, xalıqaralıq hám regionallıq shólkemlerdiń basshıları da qatnastı.
Ózbekstan Prezidenti óziniń shıǵıp sóylegen sózinde Túrkmenstandı turaqlı biytárepliktiń 30 jıllıǵı menen qızǵın qutlıqlap, bul qutlı sáne Túrkmenstannıń dúnyanıń barlıq mámleketleri menen tınısh, isenimli, doslıq hám óz-ara paydalı birge islesiwdi rawajlandırıwǵa bárqulla sadıq bolıp kiyatırǵanın ózinde jámlegenin atap ótti.
– Túrkmen xalqınıń zamanagóy ózine tánliginiń ajıralmas bólegine aylanǵan Túrkmenstannıń biytárepligi onıń tereń tariyxıy dástúrlerine, mádeniy hám ruwxıy qádiriyatlarına, adamgershilik, keńpeyillik hám jaqsı qońsıshılıq sıyaqlı jaqsı pazıyletlerine súyenedi, – dedi Prezidentimiz.
Sol sebepli, Túrkmenstannıń Birlesken Milletler Shólkemi menen birgelikte Tınıshlıq hám biytáreplik universitetin shólkemlestiriw boyınsha baslaması qollap-quwatlandı.
Mámleketimiz basshısı Jańa Ózbekstan ushın dúnyaǵa ashıq-aydınlıq, óz-ara húrmet hám pikirlesiwge umtılıw fundamental qádiriyatlar ekenin atap ótti. Bunıń tastıyıǵı sıpatında ulıwma qáwipsizlik hám abadanlıq jolında tilekleslik boyınsha Samarqand baslaması alǵa qoyılǵanın keltiriw múmkin. Bul baslama insaniyat keleshegi ushın biypárwa bolmaǵan, tınıshlıq, tatıwlıq hám turaqlı rawajlanıw ushın umtılıp atırǵan barlıq táreplerdi sóylesiwge tartıwǵa qaratılǵan.
Bunnan tısqarı, mámleketimizdiń Qosılmaw háreketindegi bolajaq basshılıǵı dáwirinde Ózbekstan tınıshlıq hám zorlıqsızlıq mádeniyatın qollap-quwatlaw boyınsha globallıq háreketti xoshametlew, siyasiy sóylesiw tiykarında mámleketler arasında isenimdi bekkemlew, dúnyada keńpeyillik, awızbirshilik hám tilekleslik ortalıǵın qarar taptırıwǵa járdemlesiwdi baslı tiykarǵı baǵdarlar sıpatında belgilewdi maqset etken.
Basshılıq dawamında, sonday-aq, keleshek áwladlardıń mápleri jolında kelispewshiliklerdi sheshiw baǵdarındaǵı háreketlerdi qollap-quwatlaw ushın 2027-jıldı Preventiv diplomatiya jılı dep járiyalaw rejelestirilgen. Onıń sheńberinde konferenciya hám forumlar shólkemlestiriw, parlament, jámiyetlik hám jaslar delegaciyalarınıń óz-ara almasıwların qamtıp alǵan ilajlar baǵdarlaması qabıl etiledi.
Prezidentimiz globallıq kólemde keskinlik saqlanıp atırǵan hám mámleketler arasında isenim tómenlep atırǵan házirgi sharayatta tınıshlıqtı súyiwshilik hám dáldalshılıq principlerine ulıwma sadıqlıq hár qashanǵıdan da úlken áhmiyetke iye bolıp atırǵanın atap ótti. Áne sol sebepli Ózbekstan Túrkmenstannıń 2025-jıldı “Xalıqaralıq tınıshlıq hám isenim jılı” dep járiyalaw haqqındaǵı usınısın qollap-quwatlap, BMSh Bas Assambleyasınıń tiyisli rezolyuciyasınıń járdemshi avtorı boldı.
Óz-ara isenim, húrmet hám awızbirshilik principleri Oraylıq Aziyanı tınıshlıq, birge islesiw hám jaqsı qońsıshılıq mákanına aylandırıw baǵdarındaǵı siyasattıń da tiykarı ekeni atap ótildi.
– Ótken ayda Tashkentte bolıp ótken region mámleketleri basshılarınıń jetinshi Másláhát ushırasıwı awızbirshilikti bekkemlew, regionda tınıshlıq hám turaqlılıqtı támiyinlew boyınsha birgeliktegi háreketler, kóp táreplemeli ekonomikalıq birge islesiwdi keńeytiwge tayar ekenimizdi jáne bir márte kórsetti, – dedi Shavkat Mirziyoev.
Usı kózqarastan, Túrkmenstannıń konstruktivlik hám tınıshlıq súyiwshilik siyasatı Oraylıq Aziyada turaqlılıq hám rawajlanıwdı támiyinlewdiń áhmiyetli faktorı esaplanatuǵınına ayrıqsha itibar qaratıldı.
Mámleketimiz basshısı Túrkmenstannıń tiykarında tınıshlıq hám isenim sıyaqlı iygilikli ideyalar jámlengen bul usınısları Ashxabadtıń region mámleketleri basshılarınıń Másláhát ushırasıwları formatındaǵı basshılıǵı dawamında kún tártibinen múnásip orın iyeleytuǵınına isenim bildirdi.
Mámleketimiz jetekshisi óz-ara húrmet, isenim hám awızbirshilikke tiykarlanǵan gumanitarlıq birge islesiwdi alǵa qoyıw áhmiyetli ekenin atap ótip, kelesi jılı Tashkentte “Mádeniyatlar qarım-qatnası” birgeliktegi xalıqaralıq gumanitarlıq forumın shólkemlestiriw hám “Jaslar tınıshlıq hám isenim jolında” regionallıq baǵdarlamasın engiziwdi usınıs etti.
Mámleketimiz basshısı sóziniń juwmaǵında Ózbekstan dúnyada ádil hám turaqlı tártipti qurıwǵa bunnan bılay da ámeliy úles qosıwǵa tayar ekenin atap ótti.
Usınıń menen Ózbekstan Respublikası Prezidenti Shavkat Mirziyoevtiń Túrkmenstanǵa ámeliy saparı juwmaqlandı.

ÓzA