Áziz perzentlerim!

Húrmetli ata-analar, ustaz hám trenerler!

Bárinen burın, bársheńizdi Watanımız turmısında óshpes iz qaldırǵan Prezident Olimpiadacı oyınlarındaǵı tabıslı qatnasıwıńız benen shın kewlimnen qızǵın qutlıqlayman.
Álbette, saylap alıw basqıshlarında 100 mıńnan aslam ul-qızlarımız arasında jeńimpaz hám sıylı orın iyeleri bolǵan 3 mıńǵa shamalas sizdey eń kúshli hám náwqıran sportshılarımızdıń múnásip qatnasıwı sebepli bul jarıslar Ózbekstan sportı teńi-tayı joq sistema bolıp qálipleskenin búgin tereń qanaatlanıwshılıq penen atap ótiwge haqılımız.
Derlik on kún dawam etken qızǵın hám mawasasız bellesiwlerde erisilgen jeńisler, rekord nátiyjeler bul pikirdi ayqın dálillep tur.
Ásirese, awır atletikashı qızlarımız Shahnoza Haydarova, Mohinur Esonboeva, jeńil atletikashı qızlarımız Sadafbonu Nusratulloeva Ózbekstan rekordın jańalaǵanı, grek-rim gúresi boyınsha 17 jasar Qamariddin Xudoyberganov ámeldegi Aziya hám jáhán chempionların, Komila Sultanova, Umarali Abdujabborov, Miraslava Omelchenko sıyaqlı taekvondoshılarımız bolsa mámleket chempionlarınan ústin kelip, eń joqarı minberlerge kóterilgeni maqtawǵa ılayıq.
Jáne bir áhmiyetli tárepi – bunnan tórt jıl burın jolǵa qoyılǵan “Bes baslama olimpiadası” sistemasında tabılǵan qábiletli jaslarımızdan 23 i usı Olimpiadanıń jeńimpaz hám sıylı orın iyelerine aylandı.
Bulardıń barlıǵı Prezidentlik olimpiadasınıń jaslarımız ushın oǵada juwapkershilikli jarısqa aylanǵanın hám óziniń dańqlı dástúrlerin qáliplestire baslaǵanın kórsetedi.
Sport tarawındaǵı dáslepki qádemlerin qádirdan máhállesinen baslaǵan, búgin óz aymaǵınıń abırayın isenimli qorǵaǵan bul perzentlerimiz keleshekte jáhán arenalarında Watanımızdıń dańqın pútkil dúnyaǵa jayatuǵınına isenemen.
Qádirli sportshı jaslar!
Sizlerdiń qatnasıwıńızda bolıp ótken bellesiwlerdi biz pútkil xalqımız benen birgelikte úlken qızıǵıwshılıq hám tolqınlanıw menen baqlap, Jańa Ózbekstanda joqarı potenciallı olimpiada rezervleri jetistirilip atırǵanınan kewlimiz quwanısh hám maqtanıshqa toldı.
Jarıstıń jeńimpaz hám sıylı orın iyeleri, olardıń ata-anaları hám trenerlerin ayrıqsha qutlıqlaǵan halda bir pikirdi atap ótpekshimen. Negizinde bunday jarıslarda qatnasıwdıń ózi úlken baxıt, úlken jetiskenlik. Sebebi bul oyınlar sizlerdiń qálbińizge Olimpiada ruwxın, Olimpiada ideyaların alıp kiredi, jáhán arenalarına isenimli barıwda úlken tájiriybe hám sheberlik mektebi bolıp xızmet etedi.
Sózsiz, biz bul sistemanı jáne de jetilistirip, onıń quramına kelesi jıldan baslap, suw sportı, velosport, triatlon, qılıshlasıw hám komandalıq sport túrlerin de kirgizemiz. Olimpiadamızdıń hár bir basqıshına xalıqaralıq sport normaları tolıq engiziledi hám joqarı sheberlikten paydalanatuǵın sportshılardı tayarlaw ushın trenerlerdi zamanagóy metodologiya hám kózqaraslar tiykarında oqıtıw sisteması jolǵa qoyıladı.
Sonday-aq, jarıslardıń nátiyjelerin ashıq-aydın usılda bahalaw ushın tóreshilerdiń mamanlıǵı arttırılıp barıladı, sport túrlerinen kelip shıǵıp, sport mektepleri hám dógereklerindegi sharayatlar jaqsılanadı.
Mine, usı jumıslardı ámelge asırıwda bıyılǵı jarıslarda toplaǵan bilim hám tájiriybeńiz, ámeliy usınıslarıńız benen sizler de múnásip qatnasasız, dep isenemen.
Pursattan paydalanıp, bul bellesiwlerdiń saylap alıw hám final basqıshların joqarı dárejede shólkemlestirgen aymaqlarımız, tiyisli ministrlikler hám uyımlardıń basshıları jáne juwapker shaxslarǵa, sport federaciyaları, joqarı oqıw orınları, texnikum hám mekteplerdiń jámáátlerine, jankúyer volontyorlarımızǵa, jaslarımızdı qollap-quwatlap atırǵan barlıq sport ıqlasbentlerine, kóp milletli xalqımızǵa shın júrekten minnetdarshılıq bildiremen.
Sizler búgin úlken sheklerdi qolǵa kirgizdińiz. Aldıńızda bolsa bunnan da biyik asırımlar turıptı.
Bársheńizge aldaǵı jarıslarda jáne de jarqın jeńis hám nátiyjeler yar bolıwın tileymen.
Tınımsız izleniwden, alǵa barıwdan hesh qashan toqtamań, áziz perzentlerim!

Shavkat MIRZIYoEV,
Ózbekstan Respublikası Prezidenti