Prezident Shavkat Mirziyoev 3-dekabr kúni Tashkentte transport basqarıwın jetilistiriw hám tıǵılıslardıń aldın alıw ilajlarına baylanıslı prezentaciya menen tanıstı.

Keyingi jılları paytaxtta jámiyetlik transporttı rawajlandırıw boyınsha bir qansha jumıslar islendi. Avtobuslar parki eki esege keńeytilip, olardıń ulıwma sanı 1,9 mıńǵa shamalastı, qatnaw intervalı 30 minuttan 15 minutqa qısqardı. Nátiyjede avtobuslardan paydalanıwshılardıń sanı kúnlik 1,4 millionǵa jetti.
Jer astı hám jer ústi metro liniyalarınıń ulıwma uzınlıǵı 70,5 kilometrge jetkerilip, bándirgiler sanı 29 dan 50 ge shekem kóbeydi. Metro bir kúnde 900 mıń jolawshıǵa xızmet kórsetpekte.
Qala kóshelerinde háreketti shólkemlestiriwdiń texnikalıq jumıslarınıń kólemi keńeyip, 2870 belgi almastırıldı, 2770 jańa belgi hám 55 svetofor ornatıldı.
Sonıń menen birge, xalıq hám transport quralları sanınıń ósiwi, qaladaǵı ekonomikalıq processler nátiyjesinde jol infrastrukturasına júkleme keskin artpaqta. Paytaxttıń tiykarǵı transport jollarına basım 2 esege artqanı, keyingi jıllardaǵı 7-8 ballıq tıǵılıslar ádettegi jaǵdayǵa aylanǵanı kórsetip ótildi. Jámiyetlik transporttan paydalanıw úlesi jeke menshik avtomobillerdikinen az bolıp qalmaqta. Bulardıń barlıǵı ekologiyalıq jaǵdayǵa da óz tásirin kórsetip kelmekte.
Dúnya ámeliyatında jol háreketin basqarıwdıń eń nátiyjeli usılı sıpatında intellektuallıq transport sisteması (ITS) keńnen qollanılmaqta. Bul qatnasqa bola, qalalarda háreketti óz waqtında qadaǵalaw, tallawdı alıp barıw hám rejelestiriw oraylasqan halda ámelge asırıladı.
Prezentaciyada usı maqsette Tashkent qalasında birden-bir jol háreketin shólkemlestiriw orayın jaratıw usınıs etildi.
Oray transport hám piyadalar aǵımların tallaw hám modellestiriw, intellektuallıq transport sistemasın engiziw hám basqarıw, transport master-rejesi hám karkasın islep shıǵıw hám engiziw, elektr quwatlaw infrastrukturasın rawajlandırıw, individual háreketleniw qurallarınan paydalanıwdı xoshametlew sıyaqlı wazıypalar menen shuǵıllanadı.
Oray intellektuallıq transport sistemasınıń operatorı esaplanadı. Bul platforma kameralar, sensorlar, GPS quralları arqalı toplanǵan maǵlıwmatlardı, atap aytqanda, jasalma intellektten paydalanǵan halda tallap, tıǵılıslar statistikasın júrgiziw hám olardı boljaw, marshrutlardı optimallastırıw, svetofor fazaların adaptiv tárizde ózgertiw, jol-transport hádiyseleri júz bergende ayrıqsha xızmetlerdi shaqırıw sıyaqlı imkaniyatlarǵa ie boladı.
Sistemanıń engiziliwi nátiyjesinde jollarda transport háreketiniń ortasha waqtı hám ayrıqsha xızmetlerdiń JTH ornına jetip keliw waqtınıń qısqarıwı, tiykarǵı jollardaǵı tıǵılıslar hám jol-transport hádiyseleriniń azayıwı kútilmekte.
Prezidentimiz usınıslardı maqullap, pilot joybardı usı jıldıń ózinde iske qosıp, kelesi jıllarda onı keńeytiw, 2030-jılǵa shekem onı aymaqlar menen integraciyalawdı tapsırdı.

ÓzA