3-dekabr – Xalıqaralıq mayıplar kúni múnásibeti menen Nókis qalasında saltanatlı ilaj bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizde Ózbekstan Respublikası Prezidenti Sh. Mirziyoev basshılıǵında xalqımız, sonıń ishinde, sociallıq járdemge mútáj, mayıplıǵı bolǵan insanlarǵa ámeliy járdem kórsetiw hám olardı qollap-quwatlaw baǵdarında ámelge asırılıp atırǵan jumıslar haqqında aytıp ótti.
Atap ótilgenindey, sońǵı jılları elimizde mámleketimiz basshısı tárepinen «Insan qádiri ushın» hám «Hesh bir insan itibar hám mehirden shette qalmawı kerek!» degen iygilikli ideya tiykarında keń kólemli reformalar ámelge asırılmaqta.
Imkaniyatı sheklengen shaxslardı qollap-quwatlaw, olardıń nızamlı máplerin qorǵaw, medicinalıq-sociallıq járdem kórsetiw, turmıs dárejesin jaqsılaw, zárúrli bilim hám kónlikpelerge iye bolıw, denetárbiya hám sport penen shuǵıllanıwı ushın barlıq sharayatlar jaratılmaqta.
Álbette, bunday ilajlardı ámelge asırıwda arnawlı baqshalar, mektep-internatları hám «Múriwbet» úyleri áhmiyetli orın tutpaqta. Eń áhmiyetlisi, mayıplıǵı bolǵan shaxslardı qollap-quwatlaw boyınsha qabıl etilip atırǵan párman hám qararlar bul baǵdardaǵı ilajlardı jańa basqıshlarǵa kótermekte.
Atap aytqanda, mayıplıǵı bolǵan shaxslardı qollap-quwatlaytuǵın Sociallıq qorǵaw milliy agentliginiń shólkemlestirildi. Sonday-aq, bıyılǵı jıl basınan berli 7 706 puqaraǵa 10 milliard sumlıq protez-ortopediya hám reabilitaciya texnikalıq buyımları berilip, reabilitaciyalıq oraylarda 1 300 den aslam puqaranıń salamatlıǵı tiklendi. Sonıń menen birge, kekse hám mayıplıǵı bolǵan 3 mıńnan aslam puqaralar ushın sanatoriyalarǵa jollamalar, mayıplıǵı bolǵan shaxslardı jumısqa alǵan 1033 kárxanaǵa bolsa 9 milliard 525 million sumlıq salıq jeńilligi berildi. 6 mıńnan aslam mayıplıǵı bolǵan shaxslar jumısqa ornalastırıldı.
Bıyılǵı jıldan baslap barlıq jańadan qurılıp atırǵan mektepler mayıplıǵı bolǵan shaxslarǵa qolaylastırıldı. Qala hám rayonlardaǵı 13,5 km aralıqtaǵı kósheler mayıplıǵı bolǵan shaxslardıń erkin háreketleniwi ushın beyimlestirilmekte. Bunnan tısqarı, búgingi kúni 25 sport orayında shólkemlestirilgen 15 sport dógereginde 600 den aslam para-sportshılar turaqlı shuǵıllanıp kelmekte. Ayrıqsha atap ótiw orınlı, mayıplıǵı bolǵan balalardı jámiyetke aralastırıw hám salamatlıǵın tiklew maqsetinde, 41 orında shólkemlestirilgen «Kúndizgi kútim xızmeti»ne 273 bala qamtıp alındı.
Usınday qollap-quwatlaw hám ǵamqorlıq nátiyjesinde mayıplıǵı bolǵan shaxslar túrli tarawlarda jemisli miynet etip, elimizdiń gúllep-rawajlanıwına ózleriniń salmaqlı úleslerin qosıp kelmekte.
Ilaj sheńberinde sáne múnásibeti menen mayıplıǵı bolǵan shaxslarǵa sawǵalar tapsırıldı.
Kórkem óner ǵayratkerleri hám mayıplıǵı bolǵan shaxslardıń birgelikte atqarıwındaǵı inklyuziv koncert baǵdarlaması bolsa, qatnasıwshılardıń kewillerine kóterińkilik baǵıshladı.

Qaraqalpaqstan xabar agentligi