Mámleketimizde kekselerdi qádirlew, olarǵa múnásip sharayat jaratıw, olardıń salamatlıǵın qorǵaw, sociallıq qorǵaw mámleketlik siyasattıń tiykarǵı baǵdarlarınan biri bolıp esaplanadı.

O‘zLiDePtiń “Kekselerge mádet” joybarı sheńberinde “Kekseler salamatlıǵın qorǵaw: mashqalalar hám sheshimler” atamasında dógerek sáwbeti ótkerildi. Onda deputatlar, ministrlikler hám uyımlardıń wákilleri, “Nuraniy” qorı, Kásiplik awqamları federaciyası hám partiya belsendileri qatnastı. Ilajda kekse áwladtı hár tárepleme qollap-quwatlaw baǵdarındaǵı áhmiyetli máseleler dodalandı.
Ushırasıwda O‘zLiDePtiń Saylawaldı baǵdarlamasında belgilengen wazıypalardan kelip shıǵıp, “Kekselerdiń salamatlıǵın qorǵaw haqqında”ǵı nızam joybarın islep shıǵıw koncepciyası hár tárepleme dodalandı.
Bul nızam joybarın islep shıǵıwdan tiykarǵı maqset kekselerdiń huqıqların hám sociallıq qorǵalıwın bekkemlew, medicinalıq xızmetlerdiń sapasın arttırıw, salıq hám sociallıq xızmetlerden paydalanıw mexanizmlerin ápiwayılastırıw, sonday-aq, máhálle – shańaraq – jámiyettiń birge islesiwin kúsheytiwden ibarat ekeni atap ótildi.
Dodalawlarda profilaktikalıq medicinalıq tekseriwlerdi turaqlı jolǵa qoyıw, patronaj xızmeti, reabilitaciya oraylarınıń jumısın rawajlandırıw, “Kekseler kartası” arqalı sociallıq jeńilliklerdi keńeytiw, aymaqlarda “Kekseler orayları” hám “Sociallıq shańaraqlar”dı shólkemlestiriw sıyaqlı baǵdarlar usınıs etildi.
Atap ótilgenindey, bul nızam joybarınıń islep shıǵılıwı hám qabıl etiliwi kekselerdiń turmıs sapasın jáne de jaqsılaw, sociallıq qorǵalıwın kúsheytiw, salamatlıǵına jáne de itibardı arttırıw jáne jámiyette kekse áwladqa bolǵan húrmet hám itibardı jáne de bekkemlewge xızmet etedi.

ÓzA