“Ózbekstan Respublikası Mámleketlik bayraǵı haqqında”ǵı nızam qabıl etilgeniniń 34 jıllıǵı “Bir Watan, bir el, bir bayraq!” súreni astında mámleketimiz boylap milliy birlik, awızbirshilik, joqarı watansúyiwshilik saltanatı sıpatında keńnen belgilenbekte.

Bizge belgili, Respublikalıq Ruwxıy-aǵartıwshılıq orayı, Ózbekstan máhálleleri awqamı, Qorǵanıw ministrligi, Milliy gvardiya, Ayrıqsha jaǵdaylar ministrligi, Mádeniyat ministrligi, Jaslar isleri agentligi, jergilikli mámleketlik hákimiyat uyımları hám bir qatar shólkemler menen birgelikte usı jıldıń 8-18-noyabr kúnleri “Bir bayraq astında” respublikalıq estafeta ilajları ótkerildi.

Simvolikalıq bayraq 8-noyabrden baslap elimizdiń barlıq aymaqların qamtıp alǵan halda, úsh jóneliste paytaxtqa qaray háreketlendi.

Birinshi, batıs jónelis – 8-noyabr kúni bayraqlı estafeta Qaraqalpaqstan Respublikası Moynaqtan baslanıp Xorezm, Buxara, Nawayı, Jizzaq, Sırdárya hám Tashkent wálayatları arqalı júrgen bolsa, ekinshi, qubla jónelis – bayraq estafetası 8-noyabr kúni Surxandárya wálayatı Sarıasiya qalasınan baslanıp Qashqadárya, Samarqand wálayatları arqalı hám úshinshi, shıǵıs jónelis boyınsha 10-noyabr kúni Ándijan wálayatı Xanabad qalasınan baslanıp Ferǵana, Namangan hám Tashkent wálayatlarınan ótip Tashkent qalasına jetip keldi.
Quwanıshlı tárepi, barlıq aymaqlarda estafeta qatarı kózlerinde, júzinde, háreketlerinde milliy maqtanısh sáwlelengen watanlaslarımız benen keńeyip bardı. Bul baslama shın mánisinde hámmeni birlestirip, ulıwma milliy háreketke aylandı.

Úsh baǵdardan kelgen rámziy bayraqlar áskerler, zıyalılar, mádeniyat ǵayratkerleri, sportshılar hám jetekshi jaslardıń qatnasıwında saltanatlı túrde kútip alındı. Simvolikalıq bayraq Bektemir rayonı “Rohat” postı, Mırza Ulıǵbek rayonı “Jańa Ózbekstan” baǵı kompleksi, CHilanzar rayonı “Erkin” postı hám Jańa Ózbekstannıń jańa mánzillerinen ótip, Tashkent qalasındaǵı “Xalıqlar doslıǵı” maydanına úsh tárepten kirip keldi hám birden-bir bayraq astında birlesti.

Keń jámiyetshilik wákilleri, zıyalılar, ilimpazlar, shayırlar, ádebiyattanıwshılar, kórkem óner hám mádeniyat ǵayratkerleri, sportshılar, áskerler, jaslar menen tolı maydanda úlken bayram baǵdarlaması shólkemlestirildi.

Ilajda Respublikalıq Ruwxıylıq hám aǵartıwshılıq orayınıń basshısı Otabek Hasanov mámleketlik nıshanlardıń tariyxıy, ruwxıy hám tárbiyalıq áhmiyeti haqqında pikir bildirip, estafeta joybarı xalqımızdı birden-bir maqset jolında birlestiriw, jaqsı arzıw-niyetlerge ilhamlandırıw, kewillerde milliy maqtanısh, watansúyiwshilik hám sadıqlıq sezimlerin jáne de bekkemlewge qaratılǵanın atap ótti.
Ilaj kórkem óner sheberleri hám atqarıwshı jaslardıń qatnasıwındaǵı gala-koncert penen dawam etti. Watan súyiwshilik, milliy maqtanısh, awızbirshilik haqqındaǵı qosıqlar hámmege kóterińki keypiyat, bayram keypiyatın baǵıshladı.

Dronlar shouı ilajdı ájayıp juwmaqladı.

Nazokat Usmonova,
ÓzAnıń xabarshısı