Ájiniyaz atındaǵı Nókis mámleketlik pedagogikalıq institutında jaslar menen ashıqtan-ashıq sáwbetlesiwdi jolǵa qoyıw, olardıń huqıqıy sawatlılıǵın arttırıw hám watansúyiwshilik ruwhında tárbiyalaw maqsetinde «Ministr hám jaslar ushırasıwı» shólkemlestirildi.

Ushırasıwda Qaraqalpaqstan Respublikası Ishki isler ministri, polkovnik Baxtiyar Tórebekov hám ishki isler uyımları wákilleri qatnastı. Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov ashıp, bul ushırasıwdıń áhmiyetine toqtap ótti hám jaslardıń mámleket jáne jámiyet turmısındaǵı belsene qatnası, olardı huqıqıy bilimler menen qurallandırıw áhmiyetli másele ekenligi atap ótildi.
Ilaj dawamında jaslar tárepinen islenip atırǵan huqıqbuzarlıqlardıń aldın alıw, jaslardıń bos waqtın mazmunlı shólkemlestiriw, olardı jámiyetlik turmısta belsene qatnasıwǵa iytermelew máseleleri boyınsha da keń túrde pikirler bildirildi.
Ishki isler ministri jaslardı profilaktikalıq ilajlarǵa belsene qatnasıp, átirapta júz berip atırǵan hár qıylı unamsız hám kewilsiz hádiyselerge biypárwa bolmastan, jámiyetlik qadaǵalawdı kúsheytiwge shaqırdı.
Ilajda jaslar qatnasıwında júz bergen hár qıylı jınayatshılıq hám huqıqbuzarlıqlardıń aqıbetleri sáwlelengen prezentaciya jıynalǵanlardıń dıqqatına usınıldı. Studentler ózlerin qızıqtırǵan sorawlarǵa juwap aldı hám ministrge pikir-usınısların bildirdi.
Ushırasıwda Kiberqáwipsizlik basqarmasınıń juwaplı xızmetkerleri tárepinen kiberjınayatlardıń aldın alıw boyınsha tiyisli túsindiriw jumısları alıp barıldı.
Ushırasıw jaslardıń huqıqıy mádeniyatın arttırıw, olardı Watan rawajlanıwı jolında juwapkershilikli bolıwǵa shaqırıw hám ishki isler uyımları menen birge islesiwdi bekkemlewde áhmiyetli qádem boldı.

Qaraqalpaqstan xabar agentligi.