Ózbekstanda hayal-liderlerdi qollap-quwatlaw hám olardıń kásiplik baylanısların rawajlandırıw maqsetinde xalıqaralıq jámiyetshiliklerdiń jumısı úlken áhmiyetke iye. Soǵan muwapıq, Taw-kán sanaatı hám geologiya ministrliginde “AKMK sherikleri” xalıqaralıq hayal-liderler jámiyetshiliginiń tórtinshi ushırasıwı shólkemlestirildi.

Onda ministrlik sistemasındaǵı kárxana hám shólkemlerdiń basshı hayal-qızları hám belsendi xızmetkerleri jáne sırt elli birge islesiwshi kompaniyalar hám Germaniyanıń Ózbekstandaǵı elshixanası wákilleri qatnastı.
Ilajda Taw-kán sanaatı hám geologiya ministriniń birinshi orınbasarı Feruza Hamidova hám “KfW IPEX-Bank” (Germaniya) biznesti rawajlandırıw direktorı, Shıǵıs Evropa, Oraylıq Aziya hám Qubla Kavkaz boyınsha basshısı Ekaterina Galicina shıǵıp sóylep, táreplerdiń birge islesiwi hayal-qızlardıń jámiyetlik turmıstaǵı ornın bekkemlewde áhmiyetli ekenin atap ótti.
Haqıyqatında da, hayal-qızlardıń jumısı zamanagóy jámiyette úlken áhmiyetke iye. Olar tek ǵana shańaraq hám jámiyetti rawajlandırıwda emes, al ekonomika, mámleketlik basqarıw, isbilermenlik hám sociallıq tarawlarda da múnásip qatnasadı. Hayal-qızlar bilim hám tájiriybelerin bólisiw, innovaciyalıq ideyalardı alǵa qoyıw hám professional baylanıslardı keńeytiw arqalı jámiyette unamlı ózgerisler jaratıwǵa úles qosadı. Sonıń menen birge, olardıń belsendiligi gender teńlikti támiyinlew hám hayal-liderlerdiń potencialın rawajlandırıwda da áhmiyetli faktor bolıp esaplanadı.
– Hayal-liderlerdiń kásiplik rawajlanıwı hám olardıń ekonomika jáne taw-kán sanaatında belsene qatnasıwın keńeytiw tiykarǵı wazıypalarımızdan. Bul ushırasıw hayal-qızlardıń pikir hám tájiriybelerin bólisiw, jańa ideyalar hám imkaniyatlardı dodalaw ushın ájayıp maydan boldı. Sóylesiwde kóterilgen máseleler taw-kán sanaatı hám ekonomikada hayal-qızlardıń ornın jáne de kúsheytiwge qaratılǵan ilajlar bolıp esaplanadı, – dedi F.Hamidova.
Germaniyanıń “KfW IPEX-Bank”iniń biznesti rawajlandırıw direktorı, Shıǵıs Evropa, Oraylıq Aziya hám Qubla Kavkaz boyınsha basshısı Ekaterina Galicina birge islesiw perspektivalarına itibar qarattı.
– Biz Ózbekstandaǵı hayal-liderler menen birge islesiwden quwanıshlımız. Bunday ushırasıwlar tek ǵana tájiriybe almasıwǵa emes, al jańa biznes-baylanıslardı rawajlandırıw hám hayal-qızlardıń joybardı basqarıwdaǵı ornın kúsheytiwge xızmet etedi. Hár bir qatnasıwshı óz tarawında jańa imkaniyatlar jaratadı, – dedi ol.
Ushırasıw juwmaqları kórsetti, hayal-liderlerdi qollap-quwatlaw hám olardıń kásiplik baylanısların rawajlandırıwda bunday xalıqaralıq jámiyetshilikler úlken áhmiyetke iye.

Nasiba Ziyodullaeva, ÓzA