Ózbekstan Respublikası Konstituciyalıq sudı dúzilgenine 30 jıl toldı. Usı múnásibet penen “Ózbekstan” xalıqaralıq ánjumanlar sarayında “Konstituciyalıq reformalar hám konstituciyalıq qadaǵalaw institutın rawajlandırıwdıń áhmiyetli máseleleri” atamasında xalıqaralıq konferenciya shólkemlestirildi.

Onda Oliy Majlis, Joqarǵı sud, Sudyalar joqarı keńesi, Bas prokuratura, Ádillik ministrligi, Tashkent mámleketlik yuridikalıq universiteti, EQBShnıń Ózbekstandaǵı joybarlarınıń koordinatorı, Konrad Adenauer qorı, onnan aslam mámleket Konstituciyalıq sudlarınıń wákilleri, 30 dan aslam ekspertler hám basqa da xalıqaralıq shólkemlerdiń wákilleri qatnastı.
Ózbekstan Respublikası Konstituciyalıq sudınıń baslıǵı Mirzo-Uluǵbek Abdusalomov ilajdı kiris sózi menen ashıp, Konstituciyalıq sud – elimizdiń rawajlanıwı jolında ǵárezsiz mámleketshilik tiykarların bekkemlew, demokratiyalıq huqıqıy mámleket hám ádil jámiyet qurıwǵa baylanıslı úlken tariyxıy processlerdiń ayqın kórinisi ekenin atap ótti. Konstituciyalıq sud búgingi kúnde ǵárezsiz Ózbekstanda huqıq ústinligi hám ádillik ideyalarınıń ámeliy kepiline aylandı. Bul sudtıń qararları Konstituciya normaları hám principlerine tikkeley ámel etiwge qaratılǵan. Mámleketlik hákimiyattıń barlıq tarmaqları hám buwınları, lawazımlı shaxslardıń jumısında ádillik, nızamlılıq, puqaralar aldındaǵı joqarı juwapkershilik, insan huqıqları menen máplerine súyengen nátiyjeli hám ádil basqarıw mádeniyatın bekkemlewde áhmiyetli orın iyeleydi.
Oliy Majlis Senatınıń Baslıǵı T.Norboeva, Nızamshılıq palatasınıń Spikeri N.Ismoilov, Joqarǵı sudtıń baslıǵı B.Islamov, Sudyalar joqarı keńesiniń baslıǵı X.Yodgorov, EQBShnıń Ózbekstandaǵı joybarları koordinatorınıń orınbasarı S.Sizov, sonday-aq, Túrkiya, Qırǵız Respublikası Konstituciyalıq sudları, Tailand Patshalıǵı Konstituciyalıq sudınıń baslıqları qutlıqlaw sózlerin bildirdi.
Xalıqaralıq konferenciya sheńberinde Tailand Patshalıǵı Konstituciyalıq sudı tárepinen 2026-2027-jıllarda Aziya konstituciyalıq sudları hám olarǵa teńlestirilgen institutlar associaciyasına basshılıq etiw Ózbekstan Respublikası Konstituciyalıq sudına ótiwi múnásibeti menen Associaciyanıń rámziy bayraǵın tapsırıw máresimi bolıp ótti.
– Aziya konstituciyalıq sudları hám olarǵa teńlestirilgen institutlar associaciyasınıń basshılıǵın Ózbekstan Respublikası Konstituciyalıq sudına rásmiy tapsırıw men ushın úlken maqtanısh, – dedi Aziya konstituciyalıq sudları hám olarǵa teńlestirilgen institutlar associaciyasınıń prezidenti, Tailand Patshalıǵı Konstituciyalıq sudınıń prezidenti Naxarin Mektrayrat. – Ózbekstannıń basshılıǵında associaciya jáne de bekkemlenip baratuǵınına, nızam ústinligin támiyinlewde jáne de áhmiyetli rol atqaratuǵınına hám insan huqıqların qorǵawda Associaciyaǵa aǵza barlıq 22 Aziya mámleketleri birlesetuǵınına isenemen.
Ilajda sáne múnásibeti menen húrmetli sudyalar, belsendi birge islesiwshi shólkemler hám ilimpazlar Ózbekstan Respublikası Konstituciyalıq sudınıń estelik belgileri menen sıylıqlandı.
Xalıqaralıq konferenciya óz jumısın úsh sessiyaǵa bólingen halda dawam ettirdi. Birinshi jalpı sessiyada konstituciyalıq reformalar hám insan mápleri, ekinshi jalpı sessiyada konstituciyalıq qadaǵalaw hám insan huqıqların qorǵaw máseleleri jáne úshinshi jalpı sessiyada konstituciyalıq ádil sudlawdı jetilistiriwdiń áhmiyetli máselelerine baylanıslı bayanatlar tıńlandı.
Ilajda jańalanǵan Konstituciya Jańa Ózbekstan strategiyasın ámelge asırıwdıń siyasiy-huqıqıy tiykarların jaratqanı atap ótildi. Onda mámleketlik qurılıstıń strategiyalıq maqseti sociallıq mámleket qurıw ekeni belgilep qoyılǵan, sociallıq ádillik hám tilekleslik principleri engizilgen. Insan huqıqları menen erkinliklerin kepillewdiń konstituciyalıq tiykarları bekkemlengen.
Konferenciyada jańa redakciyadaǵı Konstituciyanı sózsiz hám tolıq ámelge asırıw, onda bekkemlengen principlerdi Jańa Ózbekstan ullı ideyasına únles tárizde júzege shıǵarıw, mámleketlik uyımlardıń jumısın jańasha konstituciyalıq-huqıqıy sharayatlarda jolǵa qoyıw búgingi kúnniń tiykarǵı wazıypasına aylanǵanı atap ótildi.

Norgul Abduraimova, Nosirjon Haydarov (súwret), ÓzA