Kergi – tórtmúyesh formasındaǵı jún jipten túkli usılda toqılǵan astarlı qalta. Ol qara úydiń tórine – sol táreptegi keregesine qıstırıp qoyılǵan hám ıdıs-tabaqlardı salıp qoyıw ushın paydalanılǵan. Aldınǵı tárepi kóbinese “taraq” hám “múyiz” naǵısları menen toqılǵan. Shetleri (setka, túyme hám pópek usılında) shashaqlanǵan. Astarı shıttan yamasa bózden tigilgen.

Oraylıq bólimine kombinaciyalanǵan toqımashılıq úlgisinde múyiz tárizli formalarǵa iye bolǵan úsh iri romb, olardıń ortasına hár táreplerge baǵıtlanǵan tórt ilgek sızılǵan.
Qara úydiń ishine qıstırıp qoyıw ushın eki tárepine uzın toqıma jipler birlestirilgen. Olarǵa “baxıt túyinleri” hám bes-altı shashaqlı pópekler jabıstırılǵan.
Qaraqalpaq xalqı burınnan toqımalı, órilgen buyımlar shańaraqtı hár qıylı zıyanlardan, kóz-tilden qorǵaytuǵınına isengen. Sol qatarı ráńbáreń jipler menen islew berilgen túyinli, pópekli, quraqlı buyımlardı úy-ruwzıgershiliginde paydalanǵan.

Qaraqalpaqstan xabar agentligi.