Sociallıq qorǵaw milliy agentligi direktorınıń orınbasarı Usmon Sharifxwjaev Qatar Sociallıq rawajlanıw hám shańaraq ministri Busayna bint Ali an-Nuaymi menen ushırasıw ótkerdi.

Onda Qatar hám Ózbekstan arasında sociallıq qorǵaw tarawındaǵı birge islesiwdi jáne de keńeytiw perspektivaları dodalandı. Tárepler zorlıqqa qarsı gúresiw, inklyuziv bilimlendiriwdi rawajlandırıw hám sociallıq qánigelerdiń mamanlıǵın arttırıw boyınsha tájiriybe almasıwǵa tayar ekenin atap ótti.
– Biziń birge islesiwimiz mámleket basshıları dárejesinde qáliplesken óz-ara isenimge tiykarlanadı. 2023-jıl oktyabr ayında qol qoyılǵan Túsinisiw memorandumı sociallıq qorǵaw hám qorǵawǵa mútáj toparlardıń mápinde sistemalı hám uzaq múddetli birge islesiwdi jolǵa qoyıw ushın áhmiyetli tiykar boldı, – deydi Usmon Sharifxwjaev.
Sonday-aq, Qatar Sociallıq rawajlanıw hám shańaraq ministri Busayna bint Ali an-Nuaymi eki mámleket arasındaǵı birge islesiwdi joqarı bahaladı.
– Ózbekstan Respublikası menen qatnasıqlarımızdı jáne de rawajlandırıw ushın úlken imkaniyatlardı kórip atırmız. Siziń sociallıq tarawdaǵı reformalarıńız itibarǵa ılayıq hám biz qorǵawǵa mútáj xalıqqa járdem beriw jáne sociallıq qorǵaw baǵdarlarında tájiriybe almasıw baǵdarında birgelikte baslamalar islep shıǵıwǵa tayarmız, – dep atap ótti.
Sóylesiwlerdiń juwmaǵında 2026-2028-jıllar ushın Birgeliktegi háreketler rejesin islep shıǵıw boyınsha kelisimge erisildi. Reje zorlıqqa qarsı gúresiwde uyımlararalıq birge islesiw, mayıplıǵı bolǵan shaxslardıń bilimlendiriwinde inklyuziyanı rawajlandırıw hám sociallıq xızmetkerler jáne psixologlardıń mamanlıǵın arttırıwdı óz ishine aladı.
Bul hújjet 2023-jıl oktyabr ayında qol qoyılǵan Túsinisiw memorandumınıń ámeliy dawamı boladı.
Sonday-aq, xanım Busayna bint Ali an-Nuaymi Ózbekstannıń sammit sheńberinde shólkemlestirilgen kórgizbe stendi menen jaqınnan tanısıp shıǵıp, alıp barılıp atırǵan reformalarǵa joqarı baha berdi.

Sherbek Islamov,
ÓzA