Senat jalpı májilisinde “Atız shetlerinde awıl xojalıǵı ónimlerin jetistiriw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam kórip shıǵıldı.

Bul másele boyınsha bayanat jasap atırǵan Senat komitetiniń baslıǵı Anvar Twychiev awıl xojalıǵın rawajlandırıw, azıq-awqat qáwipsizligin támiyinlew, tarawdıń eksport potencialın arttırıw boyınsha keń kólemli jumıslar alıp barılıp atırǵanın atap ótti.

Biraq, atız shetlerine egin ekpew hám jıl dawamında ónim jetistirmew jaǵdayları ushırasadı. Bul xalıqtı tiykarǵı túrdegi azıq-awqat ónimleri menen kepillikli támiyinlewge hám bazarlarda ónimlerdiń ózine túser bahasına sezilerli tásir etpekte.

Bul bolsa, óz gezeginde, tarawda basqarıw sistemasın jetilistiriw, jer iyeleri, jerden paydalanıwshılar hám ijarashılar tárepinen jerlerden aqılǵa uǵras hám nátiyjeli paydalanıwdı jolǵa qoyıw zárúrligin júzege keltirmekte.

Nızam menen Hákimshilik juwapkershilik haqqındaǵı kodekske ózgerisler kirgizilmekte. Atap aytqanda, ekilemshi ijaraǵa alǵan ijarashılarǵa awıl xojalıǵına mólsherlengen jer uchastkalarınıń atız shetlerindegi kanallar, suwǵarıw hám kollektor-drenaj tarmaqları átirapında nızamshılıqqa muwapıq awıl xojalıǵı ónimlerin jetistiriw belgilengen maydanlarda hám múddetlerde qolaylı egin egilmegenligi ushın hákimshilik járiyma qollanıw názerde tutılmaqta.

Salıq kodeksinde atız shetlerindegi bunday maydanlarda qolaylı egin egilmegen jaǵdayda, bul jer uchastkasınıń egin egilmegen bólegi ushın jer salıǵı stavkasın úsh ese muǵdarda esaplaw belgilenbekte.

Senatorlar maqullanǵan nızam awıl xojalıǵına mólsherlengen suwǵarılatuǵın jer uchastkalarınıń atız shetleri jáne kanallar, suwǵarıw hám kollektor-drenaj tarmaqları átirapındaǵı maydanlarda ónim jetistiriwdi nátiyjeli shólkemlestiriwge, suwǵarılatuǵın jerlerden ónimli hám tolıq paydalanıwǵa tiykar jaratadı.

N.Abduraimova,

A.Mamadaminov (súwret), ÓzA