Aq úy AQSh Prezidenti Donald Tramp jaqın arada Qubla Koreyada bolıp ótetuǵın Aziya sammiti sheńberinde QXR Baslıǵı Si Czinpin menen ushırasatuǵının málim etti.

Nátiyjede, Amerika jetekshisi Qıtay siyrek ushırasatuǵın topıraq elementleriniń eksportına engizgen kútilmegen sheklew hám dúnyanıń iri ekonomikaları arasında sawda qarama-qarsılıǵınıń kúsheyip barıwı tiykarında CHin mámleketi basshısı menen ushırasıw máselesinde tartınıp qaldı, dep jazǵan “The Washington Times”.
Tramp bolsa “Ushırasıw eki mámleket qatnasıqlarında unamlı nátiyje beriwi múmkin”, dep esaplaydı.
– Biz kelisimge kelemiz, dep oylayman – dedi ol. – Si Czinpin menen ushırasıw Aziya saparınıń bir bólegi, Shıǵıs Aziyaǵa sapar etiwdiń tiykarǵı waqıyası bolıp tabıladı.
Aldınıraq AQSh basshısınıń Qıtay menen sawda urısı dawam etip atırǵanı haqqındaǵı bildiriwi járiyalanǵan edi. Bunnan tısqarı, Aq úy basshısı 1-noyabrden QXRdan barıp atırǵan tovarlarǵa 100 procent bajı engiziw, barlıq áhmiyetli programmalıq támiynatlarǵa eksport sheklewlerin kirgiziw rejesin de málim etken.

Qaraqalpaqstan xabar agentligi