Ózbekstan Respublikası Prezidenti Shavkat Mirziyoev Belgiyaǵa rásmiy saparı sheńberinde Evropanıń jetekshi kompaniya hám bankleriniń basshıları menen dógerek sáwbet ótkerdi.

Ushırasıwda “Vandewiele”, “Linde”, “Rhenus Logistics”, “Ahlers Logistics”, “Lasselsberger Group”, “Pietro Fiorentini”, “NextChem”, “Meridiam”, “SUEZ”, “FMO”, “European Investment Bank”, “Commerzbank”, “KfW”, “Textima”, “Chimcomplex”, “Metso” hám basqa da kompaniya hám korporaciyalardıń basshıları qatnastı.
Mámleketimiz basshısı ilajda Evropanıń jetekshi kompaniyalarınıń qatnasıp atırǵanı joqarı óz-ara isenim hám uzaq múddetli sheriklikke umtılıstıń kórinisi ekenin ayrıqsha atap ótti.
Keńeytilgen sheriklik hám birge islesiw haqqındaǵı kelisimge qol qoyılıwı Ózbekstan hám EI arasındaǵı qatnasıqlarda jańa dáwirdi baslap beretuǵını atap ótildi.
Sońǵı jeti jılda tovar almasıw eki esege kóbeydi, Evropa investiciyasınıń qatnasıwındaǵı birgeliktegi kárxanalardıń sanı mıńnan astı. Bul kórsetkishler investorlardıń Ózbekstandaǵı ekonomikalıq reformalarǵa isenimi artıp atırǵanınan derek beredi.
Evropalı sherikler Ózbekstan ekonomikasın modernizaciyalaw hám túp-tiykarınan reformalaw, aldınǵı texnologiyalar, korporativ basqarıw standartların engiziw hám innovaciyalıq óndiristi rawajlandırıwǵa járdem berip atırǵanı atap ótildi.
Prezidentimiz insan kapitalın rawajlandırıw máselelerine ayrıqsha itibar qarattı. Jaslardıń joqarı bilim alıw imkaniyatları sezilerli dárejede keńeytildi. Jańa joqarı oqıw orınları shólkemlestirildi, sırt el universitetleriniń filialları ashıldı, evropalı birge islesiwshiler menen qospa bilimlendiriw baǵdarlamaları ámelge asırılmaqta.
Ushırasıwda mámleketimiz basshısı birge islesiwdi jáne de tereńlestiriwdiń tórt áhmiyetli baǵdarın kórsetip ótti.
Ózbekstan strategiyalıq shiyki zat hám minerallardı ózlestiriw hám tereń qayta islew arqalı joqarı qosımsha qunlı tayar ónimler islep shıǵarıw boyınsha joybarlardı birgelikte ámelge asırıwdan mápdar.
“Jasıl ekonomika” hám ximiya sanaatı da birge islesiw ushın perspektivalı baǵdarlar bolıp esaplanadı. Mámleketimiz qayta tiklenetuǵın energetikanı jedel engizbekte, energetika sistemasın modernizaciyalamaqta. Evropalı sheriklerge “jasıl” energetika, energiyanı únemlew hám ekologiyalıq ximiya joybarlarında qatnasıw usınıs etildi.
Infrastrukturanı hám logistikanı rawajlandırıw da tiykarǵı áhmiyetke iye ekeni kórsetip ótildi. Ózbekstan avtomobil jolları, temir jollar hám aeroportlardı óz ishine alǵan transport tarmaǵın modernizaciya etpekte. Mámleketimiz tranzit jónelislerin rawajlandırıw, Evropa hám Aziyanı baylanıstıratuǵın zamanagóy logistika orayların qurıw boyınsha birgeliktegi joybarlardı ámelge asırıwǵa tayar.
Sanlı ekonomika hám málimleme texnologiyaları tarawına ayrıqsha itibar qaratıldı. Ózbekstan IT -Parkler hám startap inkubatorların rawajlandırmaqta hám Evropa kompaniyaları menen jasalma intellekt hám kiberqáwipsizlik tarawlarında birge islesiwge tayar.
Dógerek sáwbeti qatnasıwshıları, óz gezeginde, mámleketimizde investiciyalar ushın jaratılǵan ashıq-aydın hám turaqlı sharayatlardı joqarı bahaladı jáne elimizde jańa birgeliktegi joybar hám baslamalardı ámelge asırıwda qatnasıwǵa tayar ekenligin tastıyıqladı.

ÓzA