Qaraqalpaqstan Respublikası Ministrler Keńesiniń Baslıǵı Farhad Ermanov Saudiya Arabstanı Patshalıǵınıń iri investiciyalıq kompaniyalarınan biri – “Al Kathiri Holding Company” shólkeminiń strategiyalıq direktorı Samiya Xadjjo menen ushırasıw ótkerdi.

Ushırasıwda respublikamız benen kompaniya arasında ekonomikalıq birge islesiwdi keńeytiw, sonday-aq, infrastruktura hám qurılıs tarawlarında jańa qospa joybarlardı ámelge asırıw máseleleri dodalandı.
Sóylesiwler dawamında Nókis qalasında “Emmedue” texnologiyası tiykarında 20 mıń arzan turaq jay qurıw joybarın ámelge asırıw imkaniyatları tolıq kórip shıǵıldı. Bul joybar xalıqtıń turaq jay menen támiyinleniw dárejesin arttırıw, zamanagóy hám energiyanı únemleytuǵın turaq jaylardı qurıw arqalı regionda sociallıq infrastrukturanı rawajlandırıwǵa xızmet etedi.
Sonday-aq, ushırasıwda Nókis xalıqaralıq aeroportın modernizaciyalaw boyınsha birge islesiw perspektivaları dodalandı. Joybar sheńberinde aeroport infrastrukturasın jańalaw hám jolawshılarǵa qolaylıqlar jaratıw rejelestirilmekte.
Tárepler bul baslamalardıń mámleketlerimiz arasındaǵı ekonomikalıq baylanıslardı bunnan bılay da bekkemlew hám óz-ara paydalı birge islesiwdi tereńlestiriwge xızmet etetuǵının atap ótti.

Qaraqalpaqstan xabar agentligi