Huqıqıy múnásibet

Jumıs processlerin ápiwayılastırıw hám jedellestiriw boyınsha 2025-jıl 1-dekabrden baslap uyımlararalıq málimleme almasıwın jolǵa qoyıwda ayırım ózgerisler bolıwı kútilmekte.

Bul haqqında Tashkent mámleketlik yuridikalıq universiteti Kiberhuqıq kafedrası oqıtıwshısı Abdulaziz Abdurazzoqov tómendegilerdi málim etti.
– Mámleketimiz basshısınıń usı jıl 8-sentyabrdegi “Mámleketlik xızmetlerdi kórsetiw sistemasın jetilistiriw hám tarawda byurokratiyalıq tártip-qaǵıydalardı túp-tiykarınan qısqartıwǵa baylanıslı qosımsha ilajlar haqqında”ǵı pármanına bola, 1-dekabrden baslap uyımlararalıq málimleme almasıwın jolǵa qoyıw arqalı tómendegiler biykar etilmekte.
Atap aytqanda, nekeni rásmiylestiriwde PHAJ uyımları tárepinen nekeleniwshi shaxslardan medicinalıq tekseriw nátiyjelerin usınıw talabı, nekeden sud qararı tiykarında ajıratılǵanda nekeden ajıratılǵanlıq haqqındaǵı akt jazıwın qáliplestiriw ushın PHAJ uyımları tárepinen nekeden ajıratılǵan shaxslardan sud qararınıń talap etiliwi biykar etiledi.
Onda nekeden ajırasıw haqqındaǵı akt jazıwı sud jaylasqan jerdegi rayon (qala) PHAJ uyımı tárepinen “PHAJdıń birden-bir elektron arxivi” málimleme sistemasında avtomatikalıq túrde qáliplestiriledi hám sud qararınıń nusqası nekeden ajırasıw haqqındaǵı gúwalıqqa teńlestiriledi.
Nekeniń biykar etilgenligin dizimge alıw ushın óndiriletuǵın mámleketlik bajı sudtıń qararına tiykarlanıp erli-zayıptıń ekewinen de yamasa olardan birewinen belgilengen tártipte Májbúriy orınlaw byurosınıń rayon (qala) lıq bólimleri tárepinen óndiriledi.
Sonday-aq, shaqırılıwshılar hám áskeriy xızmetke májbúrlerdiń jasaw ornı, oqıw ornı, jumıs ornı hám lawazımındaǵı ózgerisler haqqındaǵı maǵlıwmatlardı tiyisli qorǵanıw uyımlarına usınıw minnetlemesi hám avtomototransport quralınıń dizimnen ótkeriw gúwalıǵında avtomototransport quralı iyesiniń mánzilin kórsetiw talabı da biykar etiledi.

ÓzA