Qaraqalpaqstan Respublikası Joqarǵı Keńesiniń deputatı Axmed Reymov ózi saylanǵan aymaqtaǵı Qum awıl mákan puqaralar jıyını turǵınları menen ushırasıw ótkerdi.

Ótkerilgen bul ushırasıw puqaralar menen tikkeley sóylesiw, olardıń áhmiyetli mashqalaların tıńlaw hám tiyisli máselelerdi sheshiw boyınsha pikirlesiw maqsetinde shólkemlestirildi.
Dáslep deputat A.Reymov usı jıldıń úshinshi sheregi dawamında alıp barǵan jumısları boyınsha saylawshılarǵa maǵlıwmat berdi. Bunnan soń, máhálle turǵınları menen sáwbetlesip, olardın múrájatların tıńladı.
Onda aymaq turǵınları hár qıylı sociallıq-ekonomikalıq máseleler, sonıń ishinde, Qum awılda balalar maydanshasın qurıw, kóshelerdi jaqtılandırıw sıyaqlı bir qatar máseleler boyınsha ózleriniń usınısların bildirdi.
Deputat ushırasıwda xalıq tárepinen bildirilgen hár bir máselege ayrıqsha itibar qaratıp, olardı sheshiw boyınsha tiyisli ilajlar kóriletuǵının atap ótti. Sonıń menen birge, ayırım máselelerdi óziniń qadaǵalawına alıwın hám mashqalalardı tiyisli uyımlarǵa jetkeretuǵının ayttı.
Ushırasıw qızǵın pikirlesiw ruwxında ótip, bul deputat hám xalıq arasındaǵı óz-ara isenimdi bekkemlewge xızmet etti.

Adilbay Orazov,
Qaraqalpaqstan xabar agentligi sholıwshısı