Tashkent mámleketlik transport universitetinde “Seysmikalıq qáwipsizlik, imarat hám obektlerdiń jer silkiniwge shıdamlılıǵı: injenerlik, transport hám qurılısta aldınǵı texnologiyalar” atamasındaǵı xalıqaralıq ilimiy konferenciya bolıp ótti.

Ózbekstan Respublikası Ministrler Kabineti janındaǵı Seysmologiya qorı hám Tashkent mámleketlik transport universitetiniń baslaması menen shólkemlestirilgen ilajda Ózbekstan, AQSh, Qıtay, Germaniya, Italiya, Kanada, Túrkiya, Rossiya, Belarus, Qazaqstan, Tájikstan, Kuveyt hám Malayziyadan jetik ilimpazlar, xalıqaralıq universitetlerdiń rektorları, ilimiy oraylar hám sanaat kompaniyalarınıń wákilleri qatnastı.
Konferenciyada seysmikalıq qáwipsizlik, imarat hám obektlerdiń jer silkiniwge shıdamlılıǵı, injenerlik, transport hám qurılısta aldıńǵı texnologiyalar boyınsha pikir alısıldı.
Házirgi zaman globallasıwı sharayatında Ózbekstannıń ekonomikalıq rawajlanıwı tek ǵana innovaciyalıq rawajlanıwǵa emes, al regionlardıń infrastrukturasın rawajlandırıw hám modernizaciyalaw boyınsha joybarlardı ámelge asırıwǵa da baǵdarlanǵanı menen sıpatlanadı. Bul baǵdarda Ózbekstandı jáhán ekonomikalıq processlerine tolıǵıraq integraciyalaw, xalıqaralıq sawda-ekonomikalıq, turistlik hám mádeniy baylanıslardı rawajlandırıwǵa járdemlesiw zárúr.
Bul xalıqaralıq konferenciya transport infrastrukturasınıń strategiyalıq basqarıw mexanizmin jetilistiriw tárepleriniń ilimiy nátiyjelerin dodalaw, xalıqaralıq tájiriybe almasıw hám jańa texnologiyalardı dúnya kólemindegi seysmikalıq qáwipsizlik hám imaratlardıń turaqlılıǵına izertlewge qaratılǵan.
Konferenciya altı tiykarǵı baǵdardı qamtıp alǵan. Onda seysmologiya hám jer silkiniw injenerligi, jol hám qurılıs infrastrukturası, transport sistemaları sıyaqlı baǵdarlarda qánigeler zamanagóy ilimiy nátiyjeler, innovaciyalıq usıllar hám ámeliy sheshimler boyınsha pikir alıstı.
Konferenciyanıń jalpı sessiyalarında transport infrastrukturasın seysmikalıq qorǵaw usılları, Qıtaydaǵı tunnel qurılısı texnologiyaları hám innovaciyalıq kózqaraslar, kópir qurılmaların lazerli skanerlew arqalı monitoring etiw temalarında bayanatlar tıńlandı.
Bul xalıqaralıq konferenciya seysmologiya, injenerlik hám transport infrastrukturası tarawlarındaǵı ilimiy birge islesiwdi bekkemlew, jańa texnologiyalardı engiziw hám Ózbekstandı regiondaǵı aldınǵı ilimiy oraylardan biri sıpatında tanıtıwǵa xızmet etedi.

ÓzA