Ózbekstan Respublikası AQSh Prezidenti Donald Tramptıń tikkeley járdeminde Gaza sektorında oq atıwdı toqtatıw hám girewge alınǵanlardı azat etiw boyınsha erisilgen kelisimdi qollap-quwatlaydı.

Egipet, Qatar hám Túrkiyanıń bul áhmiyetli processtegi muwapıqlastırılǵan jumısın hám olardıń áhmiyetli rolin joqarı bahalaymız. Bul háreketler zorlıqtı tez pursatta toqtatıw, gumanitarlıq krizisti jeńilletiw hám siyasiy qarım-qatnastı tiklew ushın tiykar jaratpaqta.
Ózbekstan bárqulla xalıqaralıq huqıq normaları hám BMSh Qáwipsizlik Keńesiniń rezolyuciyaları tiykarında Jaqın Shıǵısta bekkem hám ádalatlı tınıshlıq ornatılıwın qollap-quwatlaydı.
Oq atıwdı toqtatıw waqtınsha ilaj emes, al tárepler arasında qáwipsizlikti támiyinlew, turaqlı awızbirshilikti ornatıw hám óz-ara isenimdi tiklewge qaratılǵan uzaq múddetli siyasiy sheshimge qaray áhmiyetli qádem bolatuǵınına isenemiz.
Ózbekstan Respublikası Jaqın Shıǵısta tınıshlıq, turaqlılıq hám gumanitarlıq jeńillikti támiyinlewge qaratılǵan xalıqaralıq háreketlerge konstruktivlik úles qosıwǵa tayar ekenin jáne bir márte tastıyıqlaydı.

Qaraqalpaqstan xabar agentligi